कमजोर समजू नका, कोणी अंगावर आले तर शिंगावर उचलणार; खासदार अशोकराव चव्हाण

निवडणुकीत मी खोटी आश्वासने देत नाही; मी जे बोलतो ते पूर्ण करून दाखवतो.

हिमायतनगर : आरोप, प्रतिआरोप मी कोणावरही करणार नाही. मला सर्व बाजूंनी घेरले तरीही या चक्रव्यूहातून जनता मला बाहेर काढणार आहे. मला कोणी कमजोर समजू नये; कोणी अंगावर आले तर शिंगावर उचलणार आहे. लाडक्या बहिणीला आमच्या सरकारने लाभ दिला आहे. अतिवृष्टीसाठी ३५ हजार कोटी रुपये आमच्या सरकारने मिळवून दिले आहेत, असे प्रतिपादन माजी मुख्यमंत्री खासदार अशोकराव चव्हाण यांनी केले.

भाजप उमेदवारांच्या प्रचारार्थ शहरातील परमेश्वर बसस्थानक मैदानात आयोजित केलेल्या सभेत ते बोलत होते. यावेळी जिल्हाध्यक्ष किशोर देशमुख, डॉ. अंकुश देवसरकर, डॉ. प्रसाद डोंगरगावकर, तालुकाध्यक्ष गजानन चायल, प्रभाकर मुधोळकर, शहराध्यक्ष विपुल दंडेवाड, दिलीप पाटील आदींसह नगराध्यक्ष आणि नगरसेवकपदाचे उमेदवार व्यासपीठावर उपस्थित होते.

खासदार चव्हाण म्हणाले, हिमायतनगर शहराला मूलभूत सुविधांची गरज आहे. शहरात नाल्या नाहीत. रस्ते व्यवस्थित नाहीत, खड्डे आहेत; ते रस्ते दुरुस्त केले पाहिजेत. पाइपलाइन शहरभर लागली पाहिजे. पाणीपुरवठा योजना अर्धवट आहे. ती पूर्ण करण्यात यावी. निवडणुकीत मी खोटी आश्वासने देत नाही; मी जे बोलतो ते पूर्ण करून दाखवतो. त्यामुळे कोणत्याही चुकीच्या भ्रमाला बळी न पडता भाजपचे नगराध्यक्ष व नगरसेवक यांना निवडून द्या आणि आपल्या शहराचा विकास करा. मी सदैव आपल्यासाठी उपलब्ध आहे. प्रास्ताविक नगराध्यक्षपदाचे उमेदवार डॉ. राजेंद्र वानखेडे यांनी केले.