ग्रा.पं. निवडणुकीसाठी ऑनलाइनच्या विलंबासाठी ऑफलाइनची मात्रा

उमरी : होऊ घातलेल्या ग्रामपंचायतीच्या सार्वत्रिक निवडणुकीसाठी उमरी तालुक्यात ५७ पैकी फक्त २९ गावातून फक्त २०८ उमेदवारी अर्ज दाखल झाले आहेत. ऑनलाइन अर्ज भरण्यास सर्व्हर डाऊनचा अडथळा येत असल्याने बुधवारी शेवटच्या दिवशी ऑफलाइन पद्धतीने उमेदवारी अर्ज दाखल करण्याची मुभा निवडणूक आयोगाने दिली आहे.

आज दाखल झालेल्या उमेदवारी अर्जामध्ये तालुक्यातील शिरूर येथील सर्वाधिक १८ अर्ज दाखल झाले. त्याखालोखाल गोरठा १६, बेलदरा /मीयादादपूर १६, कळगाव १५, सिंधी १३, धानोरा बु. ११, पळसगाव ११, चिंचाळा ९, हिरडगाव ९ याप्रमाणे उमेदवारी अर्ज दाखल झाले आहेत. विशेष म्हणजे तालुक्‍यात सर्वाधिक लोकसंख्येच्या तळेगाव येथून अद्याप एकही उमेदवारी अर्ज दाखल झालेला नाही. उद्या बुधवारी शेवटच्या दिवशी उमेदवारी अर्ज दाखल करण्यासाठी तहसील कार्यालयात एकच गर्दी होण्याची शक्यता आहे. ऑनलाइन पद्धतीने अर्ज भरताना सर्व्हर डाऊनमुळे अर्ज भरण्यास विलंब लागत असल्याने ऑफलाइन पद्धतीने उमेदवारी अर्ज दाखल करण्यासाठी निवडणूक आयोगाने मुभा दिली आहे. त्यासाठी अर्ज भरण्याच्या शेवटच्या दिवशी म्हणजेच ३० डिसेंबर रोजी बुधवारी सायंकाळी ५ वाजता पर्यंतची वेळ वाढवून देण्यात आलेली आहे. तहसीलदार माधव बोथीकर यांनी ही माहिती दिली.