किचकट प्रोसेस व खर्चिक बाबीमुळे उमेदवारांचे कंबरडे मोडले

नेटवर्क नाही, विद्युत सेवा चार दिवसांपासून विस्कळीत भावी सरपंचाची तारंबळ

मुखेड : जिल्ह्यात सर्वाधिक मुखेड तालुक्यातील १०९ ग्रामपंचायतींची निवडणूक घोषणा झाली. यातील एक जांब बु. ग्रामपंचायत निवडणुकीस विभक्त झाल्यामुळे स्थगिती देण्यात आली असून सध्या १०८ ग्रामपंचायतींच्या निवडणुका होत असून उमेदवारी अर्ज भरण्याच्या किचकट प्रक्रिया व आर्थिक झळ यामुळे सामान्याचे निवडणूक लढवण्याचे स्वप्न अधुरे राहत असल्याचे दिसून येत असून नेटवर्क नाही व विद्युत सेवा चार दिवसांपासून विस्कळीत झाल्यामुळे भावी सरपंचाची नामांकन अर्ज दाखल करण्यास तारंबळ होत आहे.

मुखेड तालुक्यात १२९ ग्रामपंचायती असून यातील मुदत संपलेल्या १०९ पैकी १०८ ग्रामपंचायतींच्या निवडणुका होत आहेत. सध्या प्रत्येक गावात निवडणूक रनधुमाळीस वेग आला असून २३ डिसेंबरपासून नामनिर्देशनपत्र भरणे चालू झाले असून २३ डिसेंबर रोजी जरी निरंक असले तरी २४ डिसेंबर रोजी २५ जणांनी आपले उमेदवारी अर्ज दाखल केले आहेत, तर २७ डिसेंबर रोजी उमेदवारांनी आपला उमेदवारी अर्ज दाखल करण्यास मोठी गर्दी केली. तहसील कार्यालयाला यात्रेचे स्वरूप आले होते.

या ग्रामपंचायत निवडणूक उमेदवारी अर्ज दाखल करण्यासाठी भावी सरपंचांना मोठ्या अडचणींना सामोरे जावे लागत असून नेटवर्क नसणे व विद्युत पुरवठ्याचा अनियमितपणा याबरोबरच सलग तीन दिवस सुट्या यामुळे भावी सरपंचांची चांगलीच तारंबळ उडाली आहे.