नागपूर : गुरुवारी सायंकाळी नागपूर शहरातील प्रमुख मार्गांवर अचानक निर्माण झालेल्या वाहतूककोंडीने नागरिकांची परीक्षा पाहिली. कार्यालयीन वेळ संपल्यानंतर घराकडे निघालेल्या वाहनचालकांना बराच वेळ रस्त्यावर अडकून पडावे लागले. रहाटे कॉलनी, आदिवासी गोवारी शहीद उड्डाणपूल, अजनी रेल्वे स्थानक परिसर, धंतोली, चुनाभट्टी, कृपलानी चौक, दीक्षाभूमी चौक ते आयटीआय मार्ग तसेच वर्धा मार्गावर वाहनांच्या लांबलचक रांगा लागल्या होत्या.अजनी रेल्वे पुलाजवळ सकाळी व सायंकाळी होणाऱ्या कोंडीमुळे अगोदरच वाहनचालक हैराण झाले आहेत. त्यातच ओव्हरब्रीज चौकात ८० मीटर लांबीच्या अंडरपासचे बांधकाम सुरू झाले आहे. त्यासाठी वाहतुकीत बदल करण्यात आले आहे. त्यामुळे कृपलानी चौकाकडून येणाऱ्या वाहनांना मेट्रो मार्गावरून डावे वळण घेत अजनी मेट्रो स्थानकाकडे जावे लागत आहे. मात्र, अजनी पुलावरून येणाऱ्या व धंतोलीच्या दिशेने जाणाऱ्या वाहनचालकांना मोठा फेरा मारावा लागत आहे. त्यांना कृपलानी चौकापर्यंत जावे लागत आहे. त्यामुळे कृपलानी चौकात वाहतूककोंडी झाली. अगोदरच तेथे ट्रॅव्हल्सच्या बसेस उभ्या होत्या. त्यामुळे कोंडी आणखी वाढली. त्यामुळे वर्धा मार्गावर वाहने खोळंबली. रहाटे कॉलनी चौकातदेखील वाहने थांबली व ही कोंडी उड्डाणपुलाच्या शेवटच्या टोकापर्यंत पोहोचली. दुसरीकडे कृपलानी चौकापासून दीक्षाभूमी चौकाजवळपर्यंत, अजनी चौकापर्यंतदेखील वाहनांच्या लांबच लांब रांगा होत्या. इतकी मोठी वाहतूककोंडी सोडविण्यासाठी कृपलानी चौकात केवळ तीन ते चार पोलिस कर्मचारी होते. वाहतूक विभागाचे नियोजन कोलमडल्याचे दिसून आले.
अनेक रुग्णवाहिका अडकल्यासायंकाळी झालेल्या या वाहतूककोंडीमुळे अनेक रुग्णवाहिका, शालेय बस, खासगी कॅब्स आणि प्रवासी वाहनेही कोंडीत अडकली. अजनी रेल्वेस्थानक परिसरात प्रवाशांना ट्रेन पकडण्यासाठी धावपळ करावी लागली, तर दीक्षाभूमी चौक ते आयटीआय मार्गावर वाहनांची रांग शेकडो मीटरपर्यंत पोहोचली होती.
वाहनचालकांचा संताप, अगोदर नियोजन का नाहीअनेक वाहनचालकांनी पर्यायी मार्ग शोधण्याचा प्रयत्न केला; मात्र ते मार्गही काही वेळातच गर्दीने भरून गेले. नागरिकांनी वाहतूक पोलिसांच्या कार्यपद्धतीवर तीव्र नाराजी व्यक्त केली. शहरातील महत्त्वाच्या मार्गांवर आधीच गर्दीचा अंदाज असूनही कोणतेही पूर्वनियोजन का करण्यात आले नाही, असा सवाल वाहनचालकांकडून करण्यात आला.
Web Summary : Ajni construction triggered Nagpur traffic jams, blocking Wardha road. Rahate Colony, Wardha route, and flyovers experienced long queues, impacting commuters and emergency services due to poor traffic management and lack of planning.
Web Summary : अजनी येथील बांधकामामुळे नागपुरात वाहतूक कोंडी झाली, वर्धा मार्ग ब्लॉक झाला. रहाटे कॉलनी, वर्धा मार्ग आणि उड्डाणपुलांवर लांब रांगा लागल्या, ज्यामुळे खराब वाहतूक व्यवस्थापन आणि नियोजनाअभावी प्रवाशांवर आणि आपत्कालीन सेवांवर परिणाम झाला.