नागपुरातील  पारडीत ट्रकने मुलाला चिरडले

काकाच्या जन्मदिनाच्या पार्टीतून परत येणाऱ्या एक मुलाला ट्रकने चिरडले. ही घटना मंगळवारी रात्री कळमना पारडी बाजारात घडली. घटनेत मुलासह भाऊ आणि काका जखमी झाले.

ठळक मुद्दे जड वाहनांवर नियंत्रण आणावे : नागरिकांची मागणी

लोकमत न्यूज नेटवर्कनागपूर : काकाच्या जन्मदिनाच्या पार्टीतून परत येणाऱ्या एक मुलाला ट्रकने चिरडले. ही घटना मंगळवारी रात्री कळमना पारडी बाजारात घडली. घटनेत मुलासह भाऊ आणि काका जखमी झाले.दहा वर्षीय मृत मुलाचे नाव नैतिक करताल सनोडिया असून, तो भांडेवाडी पारडी येथील रहिवासी होता. जखमींमध्ये राकेश सनोडिया (२४) आणि दुग्गु सनोडिया (४) यांचा समावेश आहे. राकेश मंगळवारी रात्री दोन पुतण्यांसह सोनबानगर येथे आयोजित जन्मदिवसाच्या पार्टीत गेले होते. पार्टीनंतर तिघे रात्री १०.३० वाजता दुचाकीवरून घरी परत येत होते. पारडी बाजार पुलाजवळ पाठीमागून येणारा ट्रक क्र. ए.पी./२५/यू/६०३५ च्या चालकाने मोटरसायकलला धडक दिली. तिघेही खाली पडले. ट्रकचे चाक नैतिकच्या डाव्या पायावरून गेले. तिघांना रुग्णालयात भरती करण्यात आले. तिथे नैतिक मृत पावला. या घटनेने या परिसरात तणावाचे वातावरण निर्माण झाले. नागरिकांनी सांगितले की, या मार्गावर जड वाहनांमुळे निरंतर अपघात होतात. जड वाहनांवर नियंत्रण आणण्यासाठी कठोर उपाययोजना करणे आवश्यक आहे. नैतिक चौथ्या वर्गात होता. त्याचे वडील ट्रकचालक आहेत. या घटनेत भाऊ आणि काका बचावले. कळमना पोलिसांनी गुन्ह्याची नोंद केली आहे.