नागपूर : पती-पत्नीची नजर चुकवून ई रिक्षात बसलेल्या तीन महिलांनी १.०३ लाखांचे दागिने पळविले. ही घटना वाठोडा पोलिस ठाण्याच्या हद्दीत मंगळवारी २६ सप्टेंबरला सायंकाळी सहा ते सात वाजताच्या दरम्यान घडली.
अशोक श्रावणजी बरडे (वय ६९, रा. विघ्नहर्ता रेसीडेन्सी, अनमोलनगर) यांनी आपल्या पत्नीसह तहसिल पोलिस ठाण्याच्या हद्दीत बडकस चौक येथून १ लाख ३ हजार ४३४ रुपये किमतीचे सोन्या-चांदीचे दागिने खरेदी केले. त्यांच्या पत्नीने लहान पर्समध्ये दागिने ठेवले. पती-पत्नी ई रिक्षामध्ये बसून घरी जात होते. तेवढ्यात गंगाबाई घाट येथून तीन अनोळखी महिला ई रिक्षात बसल्या. त्यांनी अशोक आणि त्यांच्या पत्नीची नजर चुकवून त्यांच्या जवळील पर्समधून दागिने चोरून नेले. या प्रकरणी अशोक यांनी दिलेल्या तक्रारीवरून वाठोडा पोलिसांनी अज्ञात महिला आरोपींविरुद्ध कलम ३७९ नुसार गुन्हा दाखल करून त्यांचा शोध सुरु केला आहे.