‘कॅप’मध्ये प्रवेश न घेतलेल्या विद्यार्थ्यांना शिष्यवृत्तीचा लाभ मिळणार

लोकमत न्यूज नेटवर्क

नागपूर : अभियांत्रिकी व तंत्रनिकेतन अभ्यासक्रमांत ‘कॅप’च्या दोनच फेऱ्या होत्या. त्यामुळे अनेकांना त्यानंतर ‘अगेन्स्ट कॅप’मध्ये प्रवेश घ्यावा लागला. अशा विद्यार्थ्यांना शिष्यवृत्तीचा लाभ देण्यात येईल, असे आश्वासन उच्च व तंत्रशिक्षणमंत्री उदय सामंत यांनी दिले. सोबतच ज्या विद्यार्थ्यांचे जातप्रमाणपत्र, जातवैधता प्रमाणपत्र, डोमीसाईल प्रमाणपत्र बनू शकले नाही व खुल्या प्रवर्गात प्रवेश घ्यावा लागला, त्यांनादेखील शिष्यवृत्तीचा लाभ मिळेल, असेदेखील आश्वासन त्यांनी दिले असल्याची माहिती ‘विदर्भ अन-एडेड इंजिनिअरींग कॉलेजेस मॅनेजमेन्ट असोसिएशन’तर्फे देण्यात आली.

संघटनेच्या पदाधिकाºयांनी शुक्रवारी सामंत यांची भेट घेतली. आरक्षित प्रवर्गातील विद्यार्थ्यांची शिष्यवृत्ती वेळेत मिळत नाही. ‘ट्यूशन फी’ शिष्यवृत्ती थकीत आहे. त्यामुळे २०१५-१६ ते २०१९-२० या कालावधीतील थकीत शिष्यवृत्ती शासनाने द्यावी, अशी मागणी यावेळी करण्यात आली. शुल्क निर्धारण समितीने अद्यापही शिक्षण शुल्काबाबत निर्णय घेतलेला नाही. ‘डीबीटी’वरदेखील शुल्क ‘अपलोड’ झाले नसल्याने शिष्यवृत्तीच्या नूतनीकरणाचे अर्ज खोळंबले. यासंदर्भात तातडीने पावले उचलण्याचे निर्देश देण्यात यावे. तसेच सध्याची स्थिती लक्षात घेता शिक्षण शुल्कात १० टक्के वाढ करण्याची परवानगी देण्यात यावी, अशी मागणीदेखील करण्यात आली. प्रतिनिधीमंडळात अजय अग्रवाल ,अविनाश दोरसटवार, प्रमोद पापटवार, प्रशांत वासाडे, प्रशांत माहेश्वरी, सयाजी जाधव, अविनाश बदर, संजय वासाडे, अल्वी हेदेखील उपस्थित होते.