लोकमत न्यूज नेटवर्कनागपूर : नागपूर शहरातील भरतवाडा, पुनापूर आणि भांडेवाडी क्षेत्रात स्मार्ट सिटी प्रकल्प राबविला जात आहे. स्मार्ट सिटीच्या सुधारित पुनर्वसाहत आणि पुनर्वसन धोरणानुसार प्रकल्प बाधितांना भाड्याचे घर घेण्यासाठी दरमहा ५ हजार रुपये किमान भाडे मिळणार आहे. तसेच वाणिज्य व औद्योगिक क्षेत्रातील बाधितांना दरमहा १० हजार भाडे तर प्रकल्प बाधितांचे घर ७०० चौ.फूटाहून अधिक असल्यास त्यांना प्रती चौ.फूट ७.५० रुपये अतिरिक्त देण्याचा निर्णय मंगळवारी महापालिका मुख्यालयात पार पडलेल्या नागपूर स्मार्ट आणि सस्टेनेबल सिटी डेव्हलपमेंट कॉर्पोरेशन संचालक मंडळाच्या बैठकीत घेण्यात आला.नागपूर स्मार्ट सिटीचे चेअरमन व बृहन्मुंबई महानगरपालिकेचे आयुक्त प्रवीण परदेशी यांच्या अध्यक्षतेखाली ही बैठक घेण्यात आली. यावेळी महापौर संदीप जोशी, आमदार कृष्णा खोपडे, उपमहापौर मनिषा कोठे,स्थायी समिती अध्यक्ष प्रदीप पोहाणे, सत्तापक्ष नेता संदीप जाधव, पोलीस आयुक्त डॉ. भूषण उपाध्याय, आयुक्त अभिजित बांगर, जिल्हाधिकारी रवींद्र ठाकरे, संचालक अनिरुध्द शेणवाई, बसपाच्या गटनेत्या वैशाली नारनवरे, नगरसेविका मंगला गवरे आदी उपस्थित होते.प्रोजेक्ट टेंडर शुअरच्या अंमलबजावणीसाठी लोकप्रतिनिधी आणि प्रकल्पग्रस्त सहकार्य करीत असल्याने प्रकल्पाला गती मिळाली आहे. सदर प्रकल्प पथदर्शी असल्यामुळे नागपूर शहरातील इतर अविकसित भागातही राबविण्यात यावा, तसेच रस्त्याचे निर्माण कार्य तातडीने पूर्ण करण्याचे निर्देश प्रवीण परदेशी यांनी दिले. स्मार्ट सिटीतर्फे आतापर्यंत ४३ प्रकल्प बाधितांना २.९२ कोटीचा मोबदला देण्यात आला. पारडी, भरतवाडा, पुनापूर आणि भांडेवाडी क्षेत्रात १० किलोमीटर लांबीच्या रस्त्यांचे काम सुरू आहे. या भागातील लोकांना पाणीपुरवठा करण्यासाठी ४ जलकुंभाचे निर्माण व नदीवर पुलांचे बांधकाम हाती घेण्यात आल्याची माहिती यावेळी दिली.स्मार्ट सिटीचे मुख्य कार्यकारी अधिकारी डॉ. रामनाथ सोनवणे यांनी महापौर संदीप जोशी, उपमहापौर मनिषा कोठ,े सत्तापक्ष नेते संदीप जाधव, बसपाच्या गटनेत्या वैशाली नारनवरे आणि जिल्हाधिकारी रवींद्र ठाकरे तसेच दीपक कोचर यांची संचालक मंडळावर नियुक्ती झाल्याबद्दल त्यांचे स्वागत केले. बैठकीत ३० विषयांना मंजुरी देण्यात आली.मोरभवन येथे चार्जिंग सेंटर उभारणारस्मार्ट सिटी फेलोतर्फे तयार करण्यात आलेल्या सौरऊर्जेवर आधारित इलेक्ट्रीक व्हेईकल चार्जिंग स्टेशनच्या मोरभवन येथे उभारणीला मंजुरी देण्यात आली. अपारंपरिक ऊर्जास्रोताच्या माध्यमाने इलेक्ट्रीक बसची बॅटरी चार्ज करण्यात येईल. महापालिकेच्या इलेक्ट्रीक बस आणि खाजगी कार वाहनांची बॅटरी चार्ज करण्यास मदत होईल. या प्रकल्पावर ४ कोटींचा खर्च येणार आहे.झिरो वेस्ट धोरणसंचालक मंडळाने झिरो वेस्ट धोरणाला मंजुरी दिली. स्मार्ट सिटी फेलोनी हा प्रकल्प तयार केला आहे. यात सुका कचरा रिसायकल करण्यात येईल. महिला बचत गटाच्या माध्यमाने यातून महिलांना रोजगार उपलब्ध होईल. याचा प्रारंभ धरमपेठ झोनमधून करण्यात येईल. या प्रकल्पासाठी संचालक मंडळाने ३४.१८ लाखांच्या प्रस्तावाला मंजुरी दिली.