नागपूर विभागात स्वाइन फ्लूचे सहा रुग्ण

नागपूर : कोरोनाचे संकट कमी होत नाही तोच स्वाइन फ्लूने डोकेवर काढले आहे. नागपूर विभागात सहा रुग्णांची नोंद झाली असून, नागपूर जिल्ह्यात तीन, भंडारा जिल्ह्यात दोन, तर वर्धा जिल्ह्यात एक रुग्ण आढळून आला आहे. यातील एका रुग्णाचा मृत्यू झाला. परंतु त्याची अधिकृत नोंद झालेली नाही.

स्वाइन फ्लूची ओळख २००९ मध्ये झाली. त्यावर्षी नागपूर विभागातील नागपूरसह वर्धा, चंद्रपूर, भंडारा, गोंदिया व गडचिरोली जिल्हा मिळून या आजाराने ४५ रुग्णांचे बळी घेतले होते. त्यानंतर २०१० मध्ये ५४ मृत्यूंची नोंद झाली. मात्र, २०११ ते २०१४ पर्यंत मृत्यूची संख्या अर्ध्याहून कमी झाली. परंतु २०१५ मध्ये या आजाराचा प्रकोप वाढला. विभागात सर्वाधिक ७९० रुग्ण व १७९ रुग्णांचे जीव गेले. २०१६ मध्ये ७८ रुग्ण व दोनच रुग्णांच्या मृत्यूची नोंद होती. मात्र, २०१७ मध्ये ऐन उन्हाळ्यात स्वाइन फ्लूच्या रुग्णांची संख्या वाढली. ६३४ रुग्ण, तर ११९ बळी गेले. २०१८ मध्ये ६३ रुग्ण व ११ मृत्यूची नोंद तर २०१९ मध्ये ३६१ रुग्ण व ३९ मृत्यू झाले. २०२०मध्ये कोरोनाला सुरुवात होताच एकाही रुग्णाची नोंद झाली नाही. परंतु यावर्षी महिन्याभरात सहा रुग्ण आढळून आले आहेत.

-शहरात दोन तर ग्रामीणमध्ये एक रुग्ण

स्वाइन फ्लूचे नागपूर शहरात दोन, तर ग्रामीणमध्ये एक रुग्ण आढळून आला. शहरातील दोन रुग्णांमध्ये एक जरीपटका, तर दुसरा रुग्ण लॉ कॉलेज चौक परिसरातील आहे. ग्रामीणमधील एक रुग्ण हा भिलगाव येथील आहे. प्राप्त माहितीनुसार, शहरातील स्वाइन फ्लू पॉझिटिव्ह रुग्णाला एका खासगी हॉस्पिटलमधून मेडिकलमध्ये दाखल करण्यात आले होते. हा रुग्ण व्हेंटिलेटरवर होता. परंतु त्याच रात्री नातेवाइकांनी पुन्हा खासगी हॉस्पिटलमध्ये दाखल केले. दोन रुग्णांमधून एका रुग्णाचा मृत्यू झाला आहे. परंतु उपसंचालक आरोग्य विभागाकडून होणाऱ्या ‘डेथ ऑडिट’ समितीपुढे हे प्रकरण गेल्यावरच मृत्यूची नोंद होणार आहे.

-ही आहेत लक्षणे

:: ताप (१०० अंश फॅरन्हाइट किंवा त्याहून जास्त)

:: खोकला

:: सर्दी

:: थकवा

:: अंगदुखी

:: डोकेदुखी

:: घसा खवखवणे किंवा दुखणे

:: थंडी भरून येणे