नागपूर : बुद्धजयंतीनिमित्त डॉ. बाबासाहेब आंबेडकर स्मारक समितीतर्फे दीक्षाभूमी येथे चार दिवसीय बुद्ध महोत्सवाला प्रारंभ झाला. गुरुवारी सायंकाळी दीक्षाभूमी स्मारक समितीचे अध्यक्ष भदंत आर्य नागार्जुन सुरेई ससाई यांच्या हस्ते शंभर बालकांसह ज्येष्ठांनाही श्रामणेरची दीक्षा देण्यात आली.
दीक्षाभूमीच्या प्रांगणात लहान लहान बालक डोक्यावरचे केस काढून पालकांसह उपस्थित झाले. श्रामणेरची दीक्षा घेण्यासाठी सर्व बालक रांगेनी बसले. त्यांच्या पाठीमागे पालक बसले होते. पालकांचा आशीर्वाद घेतल्यानंतर बालकांनी भिक्खूचेही आशीर्वाद घेतले. अंगावर काशाय वस्त्र धारण केल्यानंतर भदंत ससाई यांच्याकडून त्रिशरणासह दशशील ग्रहण केले. सोबतच आयुष्यभर तथागत गौतम बुद्धांच्या मार्गावर चालण्याचा संकल्प केला. यानंतर उंटखाना येथील बुद्धिस्ट सेमिनरीत या सर्व श्रामणेरांना निवासी प्रशिक्षणासाठी पाठविण्यात आले. या शिबिरादरम्यान भिक्खू संघ पाच दिवस बुद्ध, धम्म आणि संघ याविषयी मार्गदर्शन करतील.
याप्रसंगी भदंत थेरो धम्मसारथी, भदंत थेरो नागवंश, भदंत धम्मप्रकाश, भदंत भीमा बोधी, भदंत नागसेन, भदंत धम्मविजय, भदंत मिलिंद, भदंत नागाप्रकाश, भदंत अश्वजित, भदंत राहुल, भिक्खुनी किसा गौतमी, शीलानंदा, संघशिला, विशाखा, धम्मप्रिया, कुंडलिका, भिक्खूनी संघप्रिया उपस्थित होत्या. कार्यक्रमाला दीक्षाभूमी स्मारक समितीचे सचिव डॉ. सुधीर फुलझेले, विलास गजघाटे यांच्यासह समितीचे सदस्य, समता सैनिक दलाचे प्रदीप डोंगरे, बालकदास बागडे उपस्थित होते.
भिक्खू संघाचे उद्या प्रवचन
भदंत सुरेई ससाई यांच्या अध्यक्षतेखाली ५ मे रोजी सायंकाळी ६ वाजता भदंत नागवंश, भदंत धम्मप्रकाश, भिक्खूनी संघप्रिया, नागकन्या, शीलानंदा आदींसह भिक्खू संघ करूणा, शांती, मैत्री आणि बुद्धांचा कल्याणाचा मार्ग यावर मार्गदर्शन करतील.