मनपात कर्तृत्ववान महिलांचा सत्कार

महिला दिन : समाजकल्याण व महिला व बालकल्याण समितीतर्फे आयोजन

लोकमत न्यूज नेटवर्क

नागपूर : जागतिक महिला दिनानिमित्त महापालिकेचा समाजकल्याण विभाग आणि महिला व बालकल्याण समितीच्या वतीने सोमवारी मनपा मुख्यालयातील डॉ.पंजाबराव देशमुख स्मृती सभागृहात आयोजित कार्यक्रमात कर्तृत्ववान महिलांचा सत्कार करण्यात आला. यात साहस पुरस्कार प्राप्त, अनेक शिखर सर करणाऱ्या बिमला नेगी देवस्कर, पोलीस उपायुक्त विनिता साहू, कोविड काळात स्थलांतरित मजुरांसाठी कार्य करणाऱ्या मनपा निगम सचिव डॉ.रंजना लाडे, पर्यावरण क्षेत्रातील ग्रीन व्हिजिल फाउंडेशनच्या सुरभी जयस्वाल, नागपूर स्मार्ट अ‍ॅण्ड सस्टेनेबल सिटी डेव्हलपमेंट कॉपोर्रेशन लिमिटेडच्या कंपनी सचिव भानुप्रिया ठाकूर, कोविड काळात उल्लेखनीय कार्य करणाऱ्या डॉ.मीनाक्षी माने व पाचपावली केंद्र यशस्वीपणे हाताळणाऱ्या डॉ.मीनाक्षी सिंग आदींचा मान्यवरांच्या हस्ते सत्कार करण्यात आला.

यावेळी महापौर दयाशंकर तिवारी, उपमहापौर मनीषा धावडे, महिला व बालकल्याण सभापती दिव्या धुरडे, उपसभापती अर्चना पाठक, झोन सभापती स्नेहल बिहारे, अभिरुची राजगिरे, मनीषा अतकरे, प्रमिला मंथरानी, सोनाली कडू, सुषमा चौधरी, उज्ज्वला शर्मा, उपायुक्त राजेश भगत, समाजकल्याण अधिकारी दिनकर उमरेडकर आदी उपस्थित होते.

पुराणातील अरुंधती, स्वातंत्र्य समरातील झांशीची राणी, अहिल्याबाई होळकर, राणी दुर्गावती अशा वीर महिलांचा इतिहास या देशाला लाभला आहे. पळवाट न काढता निष्कर्षावर पोहोचून समस्यांचे निराकरण करणे, ही या देशातील महिलांची खुबी आहे. नेतृत्व करणारी, संस्कार देणारी, जागृती करणारी, दिशा देण्याचे कार्य करणारी स्त्री ही सर्वार्थाने महान असल्याचे प्रतिपादन महापौर दयाशंकर तिवारी यांनी यावेळी केले. प्रास्ताविकातून दिव्या धुरडे यांनी समाज विकास विभागाच्या वतीने शासनाच्या योजनांच्या स्त्रियांना लाभ देऊन त्यांना आत्मनिर्भर करण्यासाठी कटिबद्ध. असल्याची गाव्ही दिली. कार्यक्रमाचे संचालन ज्योत्स्ना देशमुख यांनी तर आभार नूतन मोरे यांनी मानले.

.......

दिव्यांगांना ट्रायसिकल तर महिलांना शिवणयंत्र

समाजविकास विभागाच्या वतीने विविध योजनेंतर्गत दिव्यांग महिलांना बॅटरी मोटोराइज्ड ट्रायसिकल आणि महिलांना शिवणयंत्राचे वाटप महापौर व अन्य मान्यवरांच्या हस्ते करण्यात आले.