नागपूर : शहरातील वारांगनाची वस्ती असलेल्या गंगा जमुना परिसराजवळ धाड टाकत पोलिसांनी देहव्यापाराच्या अड्ड्याचा भंडाफोड केला आहे. यात पोलिसांनी देहव्यापाराच्या दलदलीतून राजस्थानमधील दोन मुलींची सुटका केली. लकडगंज पोलीस ठाण्याच्या हद्दीत ही घटना घडली.
गंगा जमुनाजवळील बागडे गल्ली येथे एका घरी रैना बिसन उचिया (३०, बदनापुरा, ग्वाल्हेर, मध्यप्रदेश) हि भाड्याने राहत होता. तेथेच तिने देहव्यापाराचा अड्डा बनविला. ती गरीब मुलींना जाळ्यात ओढून पैशांचे आमिष दाखवायची व त्यांच्याकडून देहव्यापार करवून घ्यायची. फ्रिडम फर्म या संघटनेचे लायझन ऑफिसर अशोककुमार सिंग (५०, सावनेर) यांना याबाबत माहिती मिळाली व त्यांनी गुन्हे शाखेचे उपायुक्त मुमक्का सुदर्शन यांना कळविले.
सुदर्शन यांच्या सूचनेवरून त्यांनी यासंदर्भात लकडगंज पोलीस ठाण्यात तक्रार केली. पोलिसांनी तेथे धाड टाकली असता २१ व २२ वर्षांच्या दोन मुली देहव्यापार करताना आढळून आल्या. पोलिसांनी त्यांची सुटका केली व उचियाला अटक केली. पोलिसांनी रैना उचियाविरोधात अनैतिक व्यापार प्रतिबंधक कायद्यानुसार गुन्हा दाखल केला आहे. दोन्ही मुली राजस्थानमधील असून त्या गरीब कुटुंबातील आहेत. त्यांना पैसे देण्याचे आमिष दाखवून उचिया त्यांना जाळ्यात ओढायची.