मोबाइल, लॅपटॉप सर्व्हिसिंग करण्याची समस्या

नागपूर : लॉकडाऊनमुळे इलेक्ट्रॉनिक्स वस्तूंच्या सर्व्हिसिंगची दुकाने बंद असल्याने लोकांना मोबाइल, लॅपटॉप आणि कॉम्प्युटर सर्व्हिसिंगची समस्या निर्माण झाली आहे.

लॉकडाऊनमुळे अत्यावश्यक सेवांच्या दुकानांव्यतिरिक्त इतर सर्व दुकाने ३० एप्रिलपर्यंत बंद आहेत. विशेषत: ऑनलाइन कोचिंग करणारे विद्यार्थी आणि घरून लॅपटॉप आणि संगणकाने कार्यालयीन काम करणाऱ्या लोकांना अनेक अडचणींचा सामना करावा लागत आहे. काम करताना मोबाइल, लॅपटॉप आणि संगणकामध्ये अनेक तांत्रिक अडचणी येत आहेत.

लॅपटॉप व मोबाइलधारक मनोज अत्री म्हणाले, सुरक्षेसाठी मोबाइलला सॅनिटायझर लावले होते. त्यानंतर मोबाइलमध्ये तांत्रिक बिघाड आला. स्क्रिन खराब झाले. दुरुस्ती कशी करायची, याची चिंता आहे. ऑनलाइन पेमेंट असो वा मुलांचे कोचिंग सर्वकाही मोबाइलने होते. आता मोबाइल खराब झाल्याने सर्व कामे ठप्प झाली आहेत. मोबाइल रिपेअरिंग शॉप बंद असल्याने दुरुस्तीसाठी समस्या येत आहे. रितू जोशी म्हणाल्या, घरूनच लॅपटॉपवर कार्यालयीन काम करते; परंतु लॅपटॉपमध्ये तांत्रिक बिघाड आल्याने काम ठप्प झाले. लॅपटॉप व कॉम्प्युटर सर्व्हिसिंग सेंटर बंद असल्याने लॅपटॉपची दुरुस्ती होऊ शकत नाही. त्यामुळे कार्यालयीन कामावर परिणाम झाला आहे.

हीच समस्या शहरातील अनेक नागरिक आणि विद्यार्थ्यांची असून मोबाइल व लॅपटॉप आणि कॉम्प्युटर सर्व्हिसिंग सेंटर बंद असल्याने त्यांना अनेक समस्या येत आहेत. त्यांनी मोबाइल व कॉम्प्युटर सर्व्हिसिंग सेंटरला अत्यावश्यक सेवेत समावेश करण्याची मागणी शासनाकडे केली आहे.