शरद मिरे
भिवापूर : भिवापूर नगरपंचायतीचा कार्यकाळ पूर्ण झाला असून पदारूढ नगरसेवक पदमुक्त झाले आहे. मार्च महिन्यात नगरपंचायतीची सार्वत्रिक निवडणूक होण्याची शक्यता लक्षात घेता, राजकीय पक्षांनी मेळावा आणि आढावा सभेच्या आयोजनाला विशेष महत्त्व दिले आहे. त्यात भाजप व काँग्रेस प्रथम स्थानी आहे तर शहरात तरुण कार्यकर्त्यांची संघटनात्मक बांधणी मजबूत असलेली शिवसेना त्यात काहीशी मागे पडल्याची दिसते. राष्ट्रवादी व बसपानेसुद्धा चाचपणी सुरू केली आहे. त्यामुळे सर्वच राजकीय पक्षांना निवडणुकीचे वेध लागल्याचे दिसते.
राज्यात नोव्हेंबर ते डिसेंबर २०२० या कालावधीत मुदत संपलेल्या तीन नगरपरिषदा व ६५ नगरपंचायतींच्या प्रभाग रचना व आरक्षण सोडत निवडणूक आयोगाच्या आदेशानुसार संभाव्य निवडणूक क्षेत्रात संपन्न झाला आहे. भिवापूर नगरपंचायतीत १७ प्रभागांची आरक्षण सोडत महिनाभरापूर्वी निघाली. त्यानुसार इच्छुकांनी जनसंपर्क अभियान सुरू केले आहे. मार्च महिन्याच्या मध्यंतरी निवडणुका जाहीर होण्याची शक्यता लक्षात घेता, राजकीय पक्षांनी विविध कार्यक्रमांचे आयोजन व केलेल्या विकासकामांचे मार्केटिंग करणे सुरू केले आहे. गत चार दिवसांपूर्वी माजी आ. सुधीर पारवे यांनी माजी मंत्री चंद्रशेखर बावनकुळे यांच्या नेतृत्वात शहरात भाजप कार्यकर्त्यांचा मेळावा घेतला. त्याच दिवशी आ. राजू पारवे यांनी नगरपंचायतीच्यावतीने आयोजित ‘कोरोना योद्धा’ कार्यक्रमात शहरात सुरू असलेल्या विकासकामांचा आढावा घेतला. मात्र, या राजकीय चढाओढीत शिवसेना काहीशी मागे पडल्याचे दिसते. कधी नव्हे त्या राष्ट्रवादी काँग्रेसनेसुद्धा प्रथमच शहरात कार्यालयाची दारे कार्यकर्त्यांसाठी उघडी केली आहे. त्यामुळे सध्या स्थितीत शहरात राजकीय वातावरण तापायला सुरुवात झाली आहे.
विकास कुणी केला?
भिवापूर शहर हे आजी व माजी आमदारांचे गृहशहर आहे. त्यामुळे नगरपंचायत निवडणुकीत पारवे बंधूंची प्रतिष्ठापणाला लागणार आहे. महाविकास आघाडी सरकार आल्यापासून शहरात विकासकामांना गती मिळाल्याचे काँग्रेसकडून सांगितल्या जात आहे तर ही सर्व कामे भाजपच्या कार्यकाळात मंजूर झाल्याचे भाजप कार्यकर्ते ठासून सांगत आहे. त्याचा निर्णय जनतेला घ्यायचा आहे.