बडतर्फ पोलीस शिपायी जयंता शेलोटला अटक

लोकमत न्यूज नेटवर्क

नागपूर : कुख्यात गुन्हेगार तसेच ड्रग माफियांसोबत वेळोवेळी कनेक्शन उघड झाल्याने पोलीस खात्यातून बडतर्फ करण्यात आलेला शिपायी जयंता गोविंदराव शेलोट (वय ४४) आणि त्याचा भाऊ विजय (वय ४६) या दोघांना बुधवारी रात्री गुन्हे शाखेच्या पथकाने खंडणी वसुलीच्या आरोपाखाली अटक केली. या दोघांना न्यायालयात हजर करून पोलिसांनी त्यांचा चार दिवसांचा पीसीआर मिळवला. या घडामोडीमुळे पोलीस दलात प्रचंड खळबळ उडाली आहे.

तक्रारकर्ता मनीष भिवाजी राऊत (वय ३१, रा. स्वावलंबीनगर) प्रॉपर्टी डिलर आहे. २०१६ मध्ये व्यवहार फसल्याने राऊतची आर्थिक कोंडी झाली. त्यामुळे त्यावेळी त्याने जयंता आणि त्याच्या भावाकडून चार लाख रुपये व्याजाने घेतले होते. महिन्याला १० टक्के व्याज ठरले होते. त्यानुसार, राऊतने शेलोटला वर्षभरात ७ लाख, २० हजार रुपये दिले. त्यानंतरही आरोपी शेलोटने चक्रवाढपद्धतीला लाजवेल अशा पद्धतीने व्याजाची आकारणी करून ५ वर्षांत ४ लाखांच्या बदल्यात १ कोटी, ३ लाख रुपयांचा हिशेब काढला. तुझ्याकडे ९७ लाख रुपये शिल्लक आहेत, असे सांगून आरोपी शेलोट बंधू राऊतला धमकावू लागले. २१ जानेवारी ते २८ जानेवारीच्या कालावधीत त्यांनी अजनीच्या भगवाननगरातील आपल्या फेब्रिकेशनच्या दुकानात बोलवून राऊतला बेदम मारहाण केली. ९७ लाख रुपये वसूल करण्यासाठी त्यांनी राऊतला वडिलोपार्जित घर विकण्यासाठी कागदपत्रे आणून देण्यास सांगितले. आरोपी जयंता शेलोटची गुन्हेगारी पार्श्वभूमी लक्षात घेता ते आपल्या घरावर कब्जा मारू शकतात, हे लक्षात आल्यामुळे राऊतने वरिष्ठ पोलीस अधिकाऱ्यांकडे तक्रार नोंदवली. त्यामुळे बुधवारी चाैकशीची चक्रे वेगात फिरली. आरोपी जयंता आणि त्याचा भाऊ विजय शेलोट या दोघांना बुधवारी रात्री गुन्हे शाखेच्या युनिट चारचे एपीआय विजय कसोधन आणि त्यांच्या सहकाऱ्यांनी ताब्यात घेऊन अजनीचे ठाणेदार विनोद चाैधरी यांच्या हवाली केले. चाैधरी यांनी आज जयंता आणि विजयला न्यायालयात हजर करून त्यांचा चार दिवसांचा पीसीआर मिळवला.

---

व्हिडीओ व्हायरल झाल्यानंतर फिरले वासे

पोलीस दलात कार्यरत असताना जयंताचा कर्मचारीच नव्हे तर पोलीस अधिकाऱ्यातही प्रचंड दबदबा होता. गुन्हेगारी वर्तुळात जबरदस्त नेटवर्क असल्याने कोणत्याही गुन्ह्यातील आरोपी शोधून काढायचे असतील तर ठिकठिकाणचे पोलीस अधिकारी आधी जयंताची मदत घेत होते. त्यामुळे जयंताने वेगळी वाट पकडली. तो गुन्हेगारांमध्ये रमला. मध्य भारताचा सर्वात मोठा ड्रग माफिया आबू खान आणि अन्य गुन्हेगारांसोबत ‘तेरे जैसा यार कहां’ या गाण्यावर नाचताना जयंताचा व्हिडीओ व्हायरल झाला. त्यामुळे जयंताचे वासे फिरले. त्याला निलंबित करण्यात आले. सेवेत रुजू झाल्यानंतरही त्याच्या वर्तनात सुधारणा होत नसल्याने आणि त्याच्यावर अनेक गंभीर आरोप झाल्याने तत्कालीन पोलीस आयुक्त डॉ. भूषणकुमार उपाध्याय यांनी त्याला पोलीस दलातून बडतर्फ केले होते. त्यानंतर जयंता अवैध सावकारी तसेच खंडणी वसुलीत सक्रिय झाल्याचे या प्रकरणातून उघड झाले आहे.

----