मासिक पास बंद केल्यामुळे मोडले प्रवाशांचे कंबरडे

नागपूर : रेल्वेगाड्यांची संख्या वाढली असली तरी अद्याप मासिक पास सेवा सुरू करण्यात आली नाही. त्यामुळे पूर्वी ५०० रुपयांत महिनाभर होणाऱ्या प्रवासासाठी प्रवाशांना तब्बल सात हजार रुपये मोजावे लागत आहेत. त्यामुळे रेल्वेने मासिक पास सुरू करून प्रवाशांना दिलासा देण्याची मागणी होत आहे.

सध्या सुरू असलेल्या रेल्वे

-०२१९० नागपूर-मुंबई दुरांतो स्पेशल

-०२१०६ गोंदिया-मुंबई विदर्भ स्पेशल

-०२०३६ नागपूर-पुणे विशेष स्पेशल

-०२१७० नागपूर-मुंबई सेवाग्राम स्पेशल

-०२२२४ अजनी-पुणे स्पेशल

-०२१५९ नागपूर-जबलपूर स्पेशल

-०११३७ नागपूर-अहमदाबाद स्पेशल

०१४०३ नागपूर-कोल्हापूर स्पेशल

-०२०४२ नागपूर-पुणे स्पेशल

-०२०२५ नागपूर-अमृतसर स्पेशल

-०२११४ नागपूर-पुणे गरीबरथ स्पेशल

-०९२१४ नागपूर-इंदूर स्पेशल

मुंबईत सवलत, आम्हाला का नाही?

- मुंबईत कोरोनाच्या लसीचे दोन डोस घेऊन १४ दिवस झाल्यानंतर प्रवाशांना मासिक पास देण्यात येत आहे; त्यामुळे नागपूर विभागातही रेल्वे प्रशासनाने मासिक पास सुरु करण्याची मागणी होत आहे. मासिक पास बंद असल्यामुळे प्रवाशांना सात हजारांवर खर्च येत असून, त्यांचे आर्थिक नुकसान होत आहे. त्यामुळे प्रवाशांचे आर्थिक नुकसान होत आहे. मुंबईप्रमाणे नागपुरातही मासिक पास देण्याची मागणी प्रवासी करीत आहेत.

भुर्दंड किती दिवस सहन करायचा?

अधिक पैसे खर्च होत आहेत

‘मी नागपूर ते वर्धा रोज प्रवास करतो. पूर्वी केवळ ५५० रुपयांत रेल्वेचे मासिक पास मिळत होते; परंतु आता महिन्याकाठी सात हजार खर्च येत आहे. त्यामुळे रेल्वेने मासिक पास सुरू करण्याची गरज आहे.’

- हरिदास मोरस्कर, प्रवासी

गोंदियाला जाणे झाले महाग

‘कामानिमित्त रोज नागपूर ते गोंदिया प्रवास करावा लागतो; परंतु रेल्वेने मासिक पास देणे बंद केल्यामुळे आर्थिक नुकसान होत आहे. पूर्वी केवळ ६६० रुपयांत मासिक पास मिळत होते; परंतु आता तब्बल ४५०० रुपये मोजावे लागत आहेत.’

- अशोक शर्मा, प्रवासी

रोज ३०० रुपयांचे पेट्रोल लागते

‘कामानिमित्त रोज सिंधी रेल्वे येथे ये-जा करावी लागते. मासिक पास सुरू असताना केवळ २७५ रुपये महिन्याला लागत होते; परंतु आता ३०० रुपयांचे पेट्रोल लागत आहे. त्यामुळे रेल्वे प्रशासनाने मुंबईप्रमाणे नागपूर विभागातही मासिक पास सुरू करण्याची गरज आहे.’

- रहमान सिद्धीक बेरा, प्रवासी

मासिक पास सुरू करणे रेल्वे बोर्डाचा निर्णय

‘मासिक पास सुरू करणे हा रेल्वे बोर्डाचा निर्णय आहे. रेल्वे बोर्डाने निर्णय घेतल्यानंतर मध्य रेल्वेच्या नागपूर विभागात मासिक पास देणे सुरू करू.’

- एस. जी. राव, जनसंपर्क अधिकारी, मध्य रेल्वे, नागपूर विभाग

...........