आदिवासींसाठी स्वतंत्र एमआयडीसीची गरज ()

लोकमत न्यूज नेटवर्क

नागपूर : आदिवासींसाठी स्वतंत्र एमआयडीसी निर्माण करण्याची गरज आहे. यासाठी संबंधित विभागप्रमुखांशी चर्चा करणार असल्याचे विधानसभा उपाध्यक्ष नरहरी झिरवाळ यांनी सांगितले.

एका कार्यक्रमासाठी ते नागपूरला आले असता रविभवन येथे पत्रकारांशी बोलताना झिरवाळ म्हणाले की, आदिवासींच्या अनेक अडचणी आहेत. त्यांच्या बेरोजगारीसोबत शिक्षणाचा मोठा प्रश्न आहे. हा सोडविण्यावर भर राहणार आहे. त्यांना मुख्य प्रवाहात आणण्यासाठी विशेष उपाययोजना करण्याची गरज आहे. आदिवासी भागात सिंचनाची सोय करण्यावर भर देण्यात येणार आहे. त्यामुळे त्यांना शेतीस मदत होईल. यासाठी लहान प्रकल्प हाती घेण्याच्या सूचना विभागाला करण्यात येतील. अनुसूचित जमाती, जाती, इतर मागासवर्गीयांच्या पदोन्नतीचा प्रश्न गेल्या अनेक दिवसांचा आहे. हा प्रश्न निकाली काढण्यास मंत्रिगटाने मंजुरी दिली आहे. लवकर पदोन्नती देण्यात येईल, असे ते म्हणाले. डीबीटीला विद्यार्थ्यांचा विरोध आहे. आदिवासी मंत्री वळवी यांच्या अध्यक्षतेखाली समिती गठित करण्यात आली आहे. या समितीचे मतही डीबीटीच्या विरोधात असल्याचे त्यांनी सांगितले.

बॉक्स

१२ आमदारांच्या नियुक्तीच्या विलंबासाठी काहीच कारण नाही. १२ आमदारांच्या नियुक्तीला होत असलेल्या विलंबाबाबत विचारले असता १२ आमदारांची यादी मुख्यमंत्र्यांनी आधीच राज्यपालांकडे सादर केली आहे. या नियुक्तीला सहसा इतका वेळ लागत नाही. या आमदारांच्या नियुक्तीच्या बिलंबाबाबत राज्यपालांकडे कुठलेही कारण नाही, असे विधानसभा उपाध्यक्ष झिरवाळ यांनी यावेळी सांगितले.