नागपूरचा निकाल खालावला; गुणवंतांमध्ये विद्यार्थिनींचीच बाजी

महाराष्ट्र राज्य माध्यमिक व उच्च माध्यमिक शिक्षण मंडळाच्या बारावी परीक्षेचा आॅनलाईन निकाल बुधवारी जाहीर करण्यात आला. मागील वर्षीच्या तुलनेत नागपूर विभागाचा निकाल १.४८ टक्क्यांनी घटला असून राज्यातील स्थानदेखील घसरले आहे.

ठळक मुद्देबारावीत नागपूर विभागाचा निकाल ८७.५७ टक्के

लोकमत न्यूज नेटवर्क
नागपूर : महाराष्ट्र राज्य माध्यमिक व उच्च माध्यमिक शिक्षण मंडळाच्या बारावी परीक्षेचा आॅनलाईन निकाल बुधवारी जाहीर करण्यात आला. मागील वर्षीच्या तुलनेत नागपूर विभागाचा निकाल १.४८ टक्क्यांनी घटला असून राज्यातील स्थानदेखील घसरले आहे. यंदा विभागाची सहाव्या स्थानावरुन शेवटून दुसऱ्या म्हणजेच आठव्या स्थानावर घसरण झाली आहे. संपूर्ण विभागाच्या निकालाची आकडेवारी ८७.५७ टक्के इतकी आहे.
विभागात नेहमीप्रमाणे मुलींनीच बाजी मारली असून उत्तीर्णांमध्येदेखील विद्यार्थिनींचेच प्रमाण जास्त आहे. विभागातून ८१ हजार ११२ विद्यार्थिनींनी परीक्षा दिली व त्यातील ७३ हजार ८१४ उत्तीर्ण झाल्या. त्यांच्या उत्तीर्ण होण्याची टक्केवारी ९१ टक्के इतकी आहे. तर विद्यार्थ्यांचे प्रमाण ८४.२४ टक्के इतके आहे. सोमवारी दुपारी १ वाजता नागपूर विभागाचे निकाल जाहीर करण्यात आले. नागपूर विभागीय मंडळाचे प्रभारी अध्यक्ष देशपांडे रविकांत देशपांडे यांनी निकालाची घोषणा केली. नागपूर विभागात एकूण १ लाख ६४ हजार ६२७ पैकी १ लाख ४४ हजार १७० परीक्षार्थ्यांनी यश संपादित केले.

नियमित विद्यार्थ्यांची विभागीय आकडेवारी
अभ्यासक्रम                         परीक्षार्थी             उत्तीर्ण                      टक्केवारी
विज्ञान                                 ७०,२६८             ६७,६३९                      ९६.२६
कला                                     ६५,१६१              ५१,०८२                       ७८.३९
वाणिज्य                               २१,४६१               १९,२१८                       ८९.५५
एमसीव्हीसी                          ७,७३७               ६,२३१                         ८०.५४
एकूण                                   १,६४,६२७             १,४४,१७०                    ८७.५७

विभागात नागपूर जिल्हा ‘टॉप’
नागपूर विभागात यंदा नागपूर जिल्ह्यातील उत्तीर्णांचे प्रमाण सर्वात जास्त आहे. नागपूर जिल्ह्यातून ६३ हजार १८३ विद्यार्थ्यांनी परीक्षा दिली होती. त्यापैकी ५७ हजार ५८८ म्हणजेच ८९.७२ टक्के विद्यार्थी उत्तीर्ण झाले. तर विभागात उत्तीर्णांची सर्वात कमी टक्केवारी गडचिरोली जिल्ह्याची आहे. तेथे १३ हजार ६७० पैकी ११ हजार ७० म्हणजे ८०.९८ टक्के परीक्षार्थी उत्तीर्ण झाले.

जिल्हानिहाय उत्तीर्णांची टक्केवारी
                 जिल्हा                               निकाल टक्केवारी
                   भंडारा                                    ८८.७३ %
                    चंद्रपूर                                   ८६.८२ %
                    नागपूर                                 ८९.७२ %
                   वर्धा                                      ८२.६८ %
                 गडचिरोली                              ८०.९८ %
                  गोंदिया                                  ८९.३६ %