नागपुरातील महाल परिसरात चोरीची घटना घडली. मुलीचे लग्न करण्यासाठी अमरावती येथे गेलेल्या एका व्यापारी कुटुंबाच्या घरातून चोरट्यांनी २४.६६ लाख रुपये नेले. चोरीचा संपूर्ण घटनाक्रम शेजारच्या एका मुलाने आपल्या मोबाईलमध्ये रेकॉर्ड केला. प्रकरणी स्थानिक पोलीस ठाण्यात गुन्हा दाखल करण्यात आला असून पोलिसांनी चोरट्यांचा शोध सुरू केला आहे. या घटनेने संपूर्ण कुटुंबाला मोठा धक्का बसला आहे.
संकेत हरीश जसानी (वय, ३१) असे पोलिसांत फिर्याद दिलेल्या व्यक्तीचे नाव आहे. जसानी कुटुंब प्लास्टिकच्या वस्तू बनवण्याचा आणि विकण्याचा व्यवसाय करतात. रविवारी संकेतच्या मुलीच्या लग्नानिमित्त अमरावती येथे लग्न होते. त्यामुळे शनिवारी रात्री संपूर्ण कुटुंब नातेवाईकांसह अमरावतीला रवाना झाले. त्याच दिवशी रात्री उशीरा चोरट्यांनी त्यांच्या घराच्या दरवाजाचे कुलूप तोडले आणि घरात प्रवेश केला.
पोलिसांत नोंदवलेल्या तक्रारीनुसार, चोरट्यांनी संकेत यांच्या घरातून पाच लाख रुपयांची रोकड, सोने- हिऱ्यांचे दागिने आणि महागड्या घड्याळ्यांसह २४.६६ लाख रुपयांचा माल चोरून नेला. रविवारी सकाळी शेजाऱ्यांनी जसानी कुटुंबाला चोरीची माहिती दिली. माहिती मिळताच संकेतने नागपूर गाठले आणि कोतवाली पोलिसांना कळवले. पोलिसांनी अज्ञात आरोपींविरुद्ध गुन्हा दाखल करून तपास सुरू केला आहे.
पोलिसांनी दिलेल्या माहितीनुसार, घटनेच्या दिवशी संकेत यांच्या शेजारी राहणारा १६ वर्षाचा मुलगा आपल्या घराच्या छतावर मोबाईलमध्ये गेम खेळत होते. पहाटे २.४० वाजताच्या सुमारास त्याला जसानीच्या घरासमोर एक कार उभी असलेली दिसली. या गाडीतून दोन जण खाली उतरले आणि जसानी यांच्या घराचे कुलूप तोडून आत गेले. त्यानंतर अर्ध्या तासाने बाहेर आले. हा संपूर्ण प्रकार शेजारच्या मुलाने आपल्या मोबाईलमध्ये रेकॉर्ड केला. या व्हिडीओच्या आधारे पोलिसांनी चोरट्यांचा शोध सुरू केला. लग्नाच्या काही तास आधी घरात चोरी झाल्याचे कळताच जसानी कुटुंबाला मोठा धक्का बसला आहे.