सक्रिय रुग्णसंख्येत राज्यात नागपूर दुसऱ्या स्थानी

सुमेध वाघमारे

नागपूर : नागपूर जिल्ह्यात कोरोनाच्या सक्रिय रुग्णांची संख्या ११ हजारांपुढे गेल्याने धाकधूक वाढली आहे. विशेष म्हणजे, राज्यात सर्वाधिक सक्रिय रुग्ण असलेल्या पहिल्या १० जिल्ह्यात विदर्भातील चार जिल्हे आहेत. यात नागपूर दुसऱ्या क्रमांकावर आहे. पाचव्या क्रमांकावर अमरावती, सहाव्या क्रमांकावर अकोला तर दहाव्या क्रमांकावर यवतमाळ जिल्हा आहे. सार्वजनिक आरोग्य विभागाच्या माहितीनुसार, पहिल्या क्रमांकावर पुणे असून येथे १९,६१५ (२१.११ टक्के) तर , नागपूर जिल्ह्यात ११,४८० (१२.३६ टक्के) अ‍ॅक्टिव्ह रुग्ण आहेत.

कोरोनाची दुसरी लाट म्हणता येत नसली तरी कोविड विषाणूचा प्रादुर्भाव वेगाने वाढत चालला आहे. विदर्भातील चार जिल्ह्यात वाढत्या रुग्णसंख्येने आरोग्य यंत्रणेसमोर मोठे आव्हान उभे ठाकले आहे. सार्वजनिक आरोग्य विभागाने ६ मार्च रोजीच्या रुग्णसंख्येवर आधारित माहिती उपलब्ध केली आहे. त्यानुसार पुणे येथे ११ फेब्रुवारी रोजी ४५८७ तर नागपूर जिल्ह्यात ३४५२ सक्रिय रुग्ण होते २३ दिवसांत या दोन्ही जिल्ह्यात साधारण चारपट वाढ झाली आहे. सक्रिय रुग्णांच्या यादीत तिसऱ्या क्रमांकावर ठाणे जिल्हा असून येथे ११ फेब्रुवारी रोजी ४३१७ तर आता १०,०४४, मुंबई येथे ११ फेब्रुवारी रोजी ४१९७ तर आता ८,९८४, अमरावती येथे ११ फेब्रुवारी रोजी १७०९ तर आता ५,०५७, अकोला येथे ११ फेब्रुवारी रोजी ५०६ तर आता ४,४४८, जळगाव येथे ११ फेब्रुवारी रोजी ५४३ तर आता ४,१६७, औरंगाबाद येथे ११ फेब्रुवारी रोजी ५५३ तर आता ३,७५६, नाशिक येथे ११ फेब्रुवारी रोजी १०६८ तर आता ३,३३२ तर यवतमाळ येथे ११ फेब्रुवारी रोजी ४४७ तर आता १,९०४ कोरोनाचे अ‍ॅक्टिव्ह रुग्ण आहेत. सक्रिय रुग्णांत वाढ होत असल्याने यातील गंभीर रुग्णही समोर येत आहेत. परिणामी, अतिदक्षता विभागातील खाटा फुल्ल होऊ लागल्य्याने चिंता वाढली आहे.

-विदर्भातील ७ जिल्ह्यात रुग्णवाढीचा दर अधिक

विदर्भातील ७ जिल्ह्यात रुग्णवाढीचा दर अधिक असल्याचे सामोर आले आहे. ६ मार्च रोजीच्या अहवालावरून अकोला जिल्ह्यात हा दर सर्वाधिक , २.११ टक्के होता. वाशिम जिल्ह्यात १.८४ टक्के, अमरावती जिल्ह्यात १.८१ टक्के, वर्धा जिल्ह्यात १.२९ टक्के, यवतमाळ जिल्ह्यात १.०५ टक्के, नागपूर जिल्ह्यात ०.७४ टक्के तर, बुलढाणा जिल्ह्यात ०.७१ टक्के होता.