नागपूर-बेळगाव विमानाचे उड्डाण १६ मार्चपासून

- आठवड्यातून तीन दिवस असेल ५० आसनी ‘उडान’

लोकमत न्यूज नेटवर्क

नागपूर : नागपुरातून प्रथमच १६ मार्चपासून बेळगाव (कर्नाटक)साठी ‘उडान’ फ्लाइट सुरू होत आहे. या विमानाचे उड्डाण आठवड्यातून तीन दिवस अर्थात मंगळवार, गुरुवार व रविवारी होईल. ही फ्लाइट दुपारी ४.४५ वाजता नागपुरात उतरेल आणि संध्याकाळी ५.१० वाजता बेळगावसाठी उड्डाण भरेल.

‘उडान’ योजनेच्या तिसऱ्या चरणात लागलेल्या बोलीमध्ये स्टार एअरने नागपूर-बेळगाव सेक्टर मिळवले आहे. यानंतर सोमवारी एअरलाइन्सच्या अधिकाऱ्यांनी डॉ. बाबासाहेब आंबेडकर आंतरराष्ट्रीय विमानतळावर मिहान इंडिया लिमिटेडच्या अधिकाऱ्यांशी चर्चा केली. एअरलाइन्स या सेक्टरवर ईआरजे १४५ विमानाचे संचालन करेल. या विमानाची आसनक्षमता ५० सिटर आहे. एकावेळी जास्तीत जास्त २,८७३ किमीचे अंतर कापण्याची क्षमता या विमानाची आहे. मात्र, या मार्गावर विमानाला नागपूर विमानतळापासून ते वीर राणी कित्तूर चेन्नमा एअरपोर्ट, बेळगावीपर्यंत जवळपास ९०० किमीचेच अंतर कापायचे आहे. मात्र, या सेक्टरला धरून अनेक प्रश्न उपस्थित केले जात आहेत. बेळगावपासून केवळ गोवाची जवळीक वाढू शकते. ‘उडान’ फ्लाइटने बेळगावला पोहोचल्यावर रस्ता मार्गाने जवळपास तीन तासात गोवा येथे पोहोचणे शक्य होईल. त्यातच नागपुरातून संचालित होणारी ही पहिली रिजनल कनेक्टिव्हिटी स्किम (आरसीएस) फ्लाइट ठरेल. नागपूर विमानतळावर लवकरच संबंधित एअरलाइन्ससाठी काउंटरसह अन्य व्यवस्था उपलब्ध करण्यात येणार आहेत.

..............