‘जलयुक्त शिवार’ची कालबद्ध अंमलबजावणी करा

जलयुक्त शिवार अभियानांतर्गत कामांची निवड करतांना शेतीसाठी प्रत्यक्ष संरक्षित सिंचनाचा लाभ होईल

विभागातील कामांचा आढावा : जलसंधारणमंत्री राम शिंदे यांच्या सूचना
नागपूर : जलयुक्त शिवार अभियानांतर्गत कामांची निवड करतांना शेतीसाठी प्रत्यक्ष संरक्षित सिंचनाचा लाभ होईल अशाच कामांना प्राधान्य देऊन कालबद्ध कार्यक्रमानुसार कामे पूर्ण करा, अशा सूचना राज्याचे जलसंधारण मंत्री प्रा. राम शिंदे यांनी गुरुवारी येथे दिल्यात.
नागपूर विभागातील जलयुक्त शिवार अभियान कामांचा आढावा जलसंधारण मंत्री प्रा. राम शिंदे यांनी घेतला त्यावेळी अधिकाऱ्यांना मार्गदर्शन करतांना ते बोलत होते. डॉ.आबासाहेब खेडकर सभागृहात आयोजित या बैठकीस पालकमंत्री चंद्रशेखर बावनकुळे, जि.प. अध्यक्षा निशा सावरकर, आमदार सुनील केदार, आ. डॉ.आशिष देशमुख, आ. समीर मेघे, आ. प्रा. अनिल सोले, आ. सुधाकर देशमुख, आ. राजेश ऊर्फ बाळा काशीवार, आ. समीर कुणावार, आ. चरण वाघमारे प्रमुख पाहुणे होते. विभागीय आयुक्त अनुप कुमार, जलसंधारण सचिव पुरुषोत्तम भापकर, कृषी आयुक्त विकास देशमुख, संचालक एस. एस. जाधव, मुख्य अभियंता शिवकुमार गिरी, महात्मा गांधी ग्रामीण रोजगार हमी योजनेचे आयुक्त अभय महाजन, अपर आयुक्त हेमंत बसेकर, उपसचिव किशोर पठारे, नारायण सराफ आदी अधिकारी उपस्थित होते.
विभागीय आयुक्त अनुप कुमार यांनी महिती देतांना सांगितले की, नागपूर विभागात १ हजार ९८१ गावांची निवड करण्यात आली होती. मागील वर्षाचे अपूर्ण व यावर्षी सुचविण्यात आलेल्या एकूण २८ हजार ७४० कामांसाठी ७५० कोटी रुपयाचा आराखडा तयार करण्यात आला आहे.
यावर्षी ३२१६ कामे हाती घेण्यात आली होती. त्यापैकी ३२०७ कामे पूर्ण झाली आहेत. ‘मागेल त्याला शेततळे’ या कार्यक्रम अंतर्गत ८४७४ च्या उद्दिष्टापैकी ८८८२ आॅनलाईन अर्ज केले. त्यापैकी ७५९४ कामे सुरु झाल्याचे सांगितले.
नागपूर विभागाचे जिल्हानिहाय आढावा जिल्हाधिकारी यांनी सादर केला. यावेळी लोकप्रतिनिधींना जलयुक्त शिवार अभियानांतर्गत लोकसहभाग वाढविण्यासाठी तसेच नियोजित वेळात कामे पूर्ण करण्यासाठी गावनिहाय कामांची माहिती उपलब्ध करुन द्यावी, अशी सूचना केली. भंडारा जिल्ह्याची जलयुक्त शिवार या पुस्तिकेचे विमोचन जलसंधारण मंत्री यांच्या हस्ते यावेळी करण्यात आले.
विभागीय आयुक्त अनुपकुमार यांनी प्रास्ताविक केले. संचालन दिनेश मासुळकर, उपमुख्य कार्यपालन अधिकारी कमलकिशोर फुटाणे व विजयी बोंद्रे यांनी केले. उपायुक्त पराग सोमण यांनी आभार मानले.(प्रतिनिधी)