नागपुरात हुक्का, ई-सिगारेट विक्रीचे रॅकेट, ‘टेक्सास’वर कारवाईची कुऱ्हाड

१७ दुकानांमध्ये धाड, ४३ लाखांचा मुद्देमाल जप्त : ‘ऑपरेशन थंडर’अंतर्गत नागपूर पोलिसांची कारवाई

योगेश पांडे

नागपूर : मागील काही दिवसांपासून शहरात गांजा, ई-सिगारेट्स, हुक्क्याचे साहित्य विक्रीचे प्रमाण वाढल्याचे दिसून येत होते. पोलिसांनी ‘ऑपरेशन थंडर’अंतर्गत ‘टेक्सास’ नावाच्या ‘स्मोक शॉप’च्या १७ दुकानांवर धाडी टाकल्या. पोलिसांना या कारवाईत मोठ्या प्रमाणावर हुक्का, ई-सिगारेट इत्यादी साहित्य आढळले. दिवसभरात पोलिसांनी १७ ठिकाणी कारवाई केल्यामुळे खळबळ उडाली होती.

नागपूर पोलिसांनी काही दिवसांपासून ‘ऑपरेशन थंडर’ राबविण्यास सुरुवात केली. त्याअंतर्गतच ‘मिशन एक्स’ची आखणी करण्यात आली. पोलिस आयुक्त डॉ. रवींद्रकुमार सिंगल यांना ‘वेब सप्लाय’च्या माध्यमातून ई-सिगारेट व हुक्का यांचा ‘टेक्सास’मध्ये साठा होत असल्याची माहिती मिळाली. पोलिसांनी खबऱ्यांच्या माध्यमातून याची खातरजमा केली. टेक्सासच्या स्मोक शॉप्समधून ई-सिगारेट, हुक्का, गांजा पेपर, चारकोल, टोबॅको फ्लेवर, निकोटिन लिक्विड्स, गन टाईप लायटर अशा एकापेक्षा एक धोकादायक व प्रतिबंधित वस्तू खुलेआम विकल्या जात असल्याचे समोर आले. काही ठिकाणांहून तर घरपोच सेवा सुरू असल्याचीदेखील बाब निदर्शनास आली.

पोलिसांनी १७ दुकानांवर धाड टाकण्याचे नियोजन केले. २७ मे रोजी सायंकाळी कारवाईला सुरुवात झाली. पोलिसांनी या कारवाईत टेक्सास स्मोक शॉपच्या १३ ठिकाणी, एका गोडाऊनमध्ये तसेच दोन पान मटेरियल दुकाने अशा एकूण १७ ठिकाणी छापेमारी केली. एकूण ३२ जागांवर झडती घेण्यात आली. तेरा पोलिस ठाण्यांच्या हद्दीत एकूण १६ गुन्हे दाखल करण्यात आले असून, एकूण २६ आरोपींविरुद्ध कारवाई करण्यात आली आहे. यामध्ये ई-सिगारेट तसेच हुक्का पॉट, हुक्का फ्लेवर व इतर साहित्य जप्त करण्यात आले. एकूण १६ ठिकाणांहून मिळून मोबाईल फोन, मोपेड वाहन, हुक्का साहित्य असा एकूण ४३.३७ लाखांचा मुद्देमाल जप्त करण्यात आला.

दीडशे पोलिस अन् १६ पथके

‘ऑपरेशन एक्स’साठी एकाच वेळी पोलिसांची १६ पथके कारवाईसाठी निघाली. यात दीडशेहून अधिक पोलिस अधिकारी-कर्मचारी होते. पोलिस आयुक्त स्वत: या कारवाईवर लक्ष ठेवून होते. प्रत्येक पथकात गुन्हे शाखेतील एक अधिकारी, तीन अंमलदार व स्वत: आयुक्तांनी नियुक्त केलेला कर्मचारी होता. या कारवाईबाबत गुप्तता बाळगण्यात आली होती. कोणत्याही पथकाला एकमेकांबद्दलची माहिती देण्यात आली नाही. प्रत्येक पथकाला फक्त एका पोलिस स्टेशनच्या नावाचा लिफाफा दिला गेला.

या ठिकाणी झाली कारवाई

पोलिस ठाणे : पत्ता : जप्त मुद्देमाल

एमआयडीसी : टेक्सास शॉप, यशोदानगर, टाकळी सीम : २.९७ लाख

प्रतापनगर : टेक्सास शॉप, गॅलेक्सी मर्श अपार्टमेंट, माटे चौक : २.४५ लाख

प्रतापनगर : टेक्सास शॉप, पराते कॉम्प्लेक्स, वेंकटेशनगर : ३.४१ लाख

सीताबर्डी : टेक्सास शॉप, झेंडा चौक, अग्रसेन मार्ग : १.०५ लाख

सदर : टेक्सास शॉप, व्हीसीए स्टेडियम : १० हजार

सदर : चौरसिया पान शॉप, छावणी : ४२ हजार

गिट्टीखदान : कुमार रेसिडेन्सी, दाभा मार्ग : २९ हजार

लकडगंज : टेक्सास शॉप, वैष्णोदेवी चौक : ३२ हजार

सक्करदरा : टेक्सास शॉप, भांडे प्लॉट : २.०८ लाख

सक्करदरा : टेक्सास शॉप, छोटा ताजबाग, दिघोरी : २.०८ लाख

अजनी : टेक्सास शॉप, रक्षक मार्केट, मानेवाडा चौक : २.१८ लाख

वाठोडा : टेक्सास शॉप, चामट चक्की चौक : ४२ हजार

हुडकेश्वर : टेक्सास शॉप, बेसा पिंपळा मार्ग : ८२ हजार

बेलतरोडी : टेक्सास शॉप : ३.६६ लाख

नंदनवन : गोलू पान पॅलेस : ३९ हजार

नंदनवन : गोडाऊन, साईनगर : २१.५१ लाख

जरीपटका : टेक्सास शॉप, हिरानगर चौक : १.२२ लाख

मंदिराखाली तयार केले तळघर

मुख्य सूत्रधार आशिष उर्फ अंकुश अमृतलाल शाहू याने नागपूर शहरात पाच ते सहा वर्षांपूर्वी ही फ्रँचाइझी सुरू केली होती. शाहू याच्या राहत्या घरासमोर मंदिराखालील तळघरात तयार केलेल्या गोडाऊनमध्ये मोठ्या प्रमाणावर हुक्का साहित्याचा साठा आढळून आला.