नागपूर : होळीच्या दिवसात विदर्भात काही ठिकाणी उष्णतेची लाट येण्याची शक्यता हवामान विभागाने वर्तविली आहे. त्याबाबतचा येलो अलर्ट जारी करण्यात आला असून नागरिकांना सावधगिरी बाळगण्याचे आवाहन करण्यात आले आहे.
गेल्या २४ तासांत विदर्भातील जिल्ह्यांत हवामान कोरडे राहिले. नागपुरात गुरुवारी दुपारी उष्णतेच्या ज्वाळा जाणवल्या. कमाल तापमान ३८ अंश सेल्सिअस ते ४१ अंश सेल्सिअसदरम्यान होते, जे सामान्यपेक्षा जास्त होते. किमान तापमान १९ अंश सेल्सिअस ते २४ अंश सेल्सिअसदरम्यान राहिले, जे सामान्यच्या जवळपास होते.
अकोल्यात सर्वाधिक तापमानाची नोंद झाली. यानंतर चंद्रपूर, ब्रह्मपुरी आदी ठिकाणी तापमान सर्वाधिक होते. पुढील दोन दिवस कमाल तापमानात कोणताही मोठा बदल होणार नाही. सुमारे २ अंश सेल्सिअसने वाढ होईल, असा अंदाज आहे. त्यानंतर पुढील काही दिवसांत विदर्भात २-३ अंश सेल्सिअसची हळूहळू घट होईल.
मात्र, हा दिलासा फार काळ राहणार नाही. उष्ण वाऱ्यांची मालिका सुरू झाली आहे. नागपूरचा उष्मा वाढू लागला आहे. उष्माघात टाळण्यासाठी सावधगिरी हाच उपाय आहे.
अशी घ्या काळजी
कडक सूर्यप्रकाशात बाहेर जाणे टाळा
हलक्या रंगाचे, सैल आणि सुती कपडे घाला.
टोपी किंवा छत्रीने डोके झाका.
तहान लागली नसली तरी पुरेसे पाणी प्या.
ओआरएस, लस्सी, मथ, लिंबूपाणी, ताक घ्या.
दुपारी १२ ते ३ वाजेपर्यंत घराबाहेर काम करू नका.
जनावरांना पाणीपुरवठा असलेल्या शेडमध्ये ठेवा.
उन्हाळी हंगामात पिके, जनावरे आणि शेतकरी यांचे संरक्षण करण्यासाठी पुरेशा प्रमाणात सिंचन, सावली आणि जमिनीतील ओलावा याची खात्री करा.
तसेच दुपारची कामे आणि जास्त खतांचा वापर टाळा.