नागपूर : घरगुती वादातून एका पतीच्या अंगात अक्षरश: सैतान शिरला आणि त्याने आपल्या पत्नीवर अगोदर सिलिंडरने प्रहार करून व नंतर तिचा गळा दाबून तिची हत्या केली. मात्र त्याला या गोष्टीचा तेव्हा कुठलाही पश्चाताप झाला नाही. तो रात्रभर तिच्या मृतदेहाशेजारी झोपला व त्याने काही वेळ मोबाइलदेखील बघितला. सकाळी तो पोलिस ठाण्यात पोहोचला. हा प्रकार ऐकून पोलिसदेखील अचंबित झाले. हुडकेश्वर पोलिस ठाण्याच्या हद्दीत ही भयंकर घटना घडली.
अबरजरीन नय्यर समीर अन्सारी (३५) असे मृत पत्नीचे नाव असून समीर मोहम्मद हनिफ अन्सारी (४९) हा आरोपी पती आहे. दोघांनीही काही कालावधी अगोदर हुडकेश्वरच्या बहादुरा येथील घोडनी सिममध्ये टेक ऑफ गार्डन स्कीममधील ई-विंगमध्ये फ्लॅॅट घेतला होता. दोघांचेही सात वर्षांअगोदर लग्न झाले होते. मात्र त्यांना मूलबाळ नव्हते. पती लैंगिक समस्येने ग्रस्त होता व त्यामुळे त्यांना मूल होत नव्हते. त्यांच्यात काही वर्षांपासून लहानसहान गोष्टींवरून वाद होत होते.
सोमवारी रात्री दोन ते तीन वाजताच्या दरम्यान कपडे न आणल्याच्या कारणावरून त्यांचा परत वाद झाला. पत्नीने त्याला अपमानास्पद शब्द बोलले व यामुळे समीर संतापला. पत्नी झोपली असताना त्याने स्वयंपाकघरातून भरलेले गॅस सिलिंडर आणले व तिच्या डोक्यातच घातले. त्याने पाच ते सहा वेळा सिलिंडरने प्रहार केला. अगोदर त्याला तिचा मृत्यू झाल्याचे वाटले. मात्र हालचाल होत असल्याने त्याने तिचा गळा दाबून जीव घेतला. यानंतर हातपाय धुऊन त्याने हाती मोबाइल घेतला व तासभर रिल्स पाहत बसला. त्यानंतर तो झोपी गेला.
सकाळी उठून तो वाठोडा पोलिस ठाण्यात गेला व त्याने पत्नीची हत्या केल्याची माहिती दिली. वाठोडा पोलिस ठाण्यातून याची माहिती हुडकेश्वर पोलिस ठाण्यात देण्यात आली. पोलिस उपनिरीक्षक नरेश पंडित यांनी त्याच्याविरोधात गुन्हा दाखल केला व त्याला अटक करण्यात आली.