लोकमत न्यूज नेटवर्क
नागपूर : गुंठेवारी विभाग मनपाकडून नासुप्रकडे हस्तांतरित करण्याचा निर्णय मंत्रिमंडळाने घेतला आहे. याबाबतचा अद्यादेश लवकरच प्राप्त होईल, असे मनपा आयुक्त राधाकृष्णन बी. यांनी स्पष्ट केले. परंतु अद्याप अध्यादेश प्राप्त झाला नसल्याने नियमितीकरण नोंदणी (स्क्रुटीनी) शुल्क म्हणून एक हजारावरून दोन हजार करण्याच्या प्रस्तावाला मनपा सभेत गुरुवारी मंजुरी देण्यात आली. गुठेवारी नासुप्रकडे देण्याच्या निर्णयावर आमदार प्रवीण दटके, धर्मपाल मेश्राम यांनी नाराजी व्यक्त केली.
महसूल वाढीसाठी भूखंड नियमितीकरण नोंदणी शुल्क तब्बल १५ हजार रुपये आकारण्याचा प्रस्ताव होता. मात्र, स्थायी समिती अध्यक्ष विजय झलके यांनी याला विरोध दर्शवून शुल्क दोन हजार करण्याची सूचना केली. महापौर दयाशंकर तिवारी यांनी या प्रस्तावाला मंजुरी दिली.
७५ हेल्थ पोस्टला मंजुरी
पदभार स्वीकारताच महापौर दयाशंकर तिवारी यांनी शहरात मनपाची ७५ हेल्थ पोस्ट निर्माण करण्याची घोषणा केली होती. त्यानुसार याबाबतचा प्रस्ताव सर्वसाधारण सभेत मंजूर करण्यात आला. हेल्थ पोस्टमध्ये रुग्णांची तपासणी व औषधोपचार (ओपीडी) केले जाईल. रुग्णाला गरज पडल्यास जवळच्या नागरी प्राथमिक आरोग्य केंद्रात उपचारासाठी पाठविण्याची व्यवस्था संबंधित हेल्थ पोस्टमध्ये असेल. ७५ हेल्थ पोस्टच्या निर्मितीसाठी मनपाला इमारत बांधकाम, वीज बिल आणि पाणी यासाठी येणारा खर्च करावयाचा आहे. उर्वरित डॉक्टर, परिचारिका, औषधी यासाठी लागणारा संपूर्ण खर्च संबंधित सामाजिक संस्था करणार आहेत.