डाॅ. बाबासाहेब आंबेडकर चरित्र साधने प्रकाशन समितीचे काम ठप्प

नागपूर : महाविकास आघाडीचे सरकार येताच डॉ. बाबासाहेब आंबेडकर चरित्र साधने समितीवरील अशासकीय सदस्यांची नेमणूक रद्द करण्यात आली. आता वर्ष होत आहे; परंतु नवीन सदस्यांची नेमणूक झालेली नाही. परिणामी खंड प्रकाशनाचे काम ठप्प पडले आहे. त्यामुळे सदस्यांची नेमणूक करून समितीचे पुनर्गठण तातडीने करा, अशी मागणी भारतीय दलित पँथरचे अध्यक्ष प्रकाश बन्सोड यांनी केली आहे.

राज्यातील सत्तांतरण झाल्यानंतर २७ जानेवारी २०२० राेजी शासन निर्णयानुसार डॉ. बाबासाहेब आंबेडकर, महात्मा जोतिबा फुले, राजर्षी शाहू महाराज चरित्र साधने प्रकाशन समितीवरील अशासकीय सदस्यांच्या नेमणुका रद्द केल्या. याला आता वर्ष झाले. राज्य शासनाने नुकतेच जोतिबा फुले चरित्र साधने प्रकाशन समिती व लोकशाहीर अण्णा भाऊ साठे चरित्र साधने प्रकाशन समितीची पुनर्रचना केली. यात सदस्यांची नेमणूक केली. त्याबद्दल शासनाचे अभिनंदन. मात्र डॉ. बाबासाहेब आंबेडकर चरित्र साधने प्रकाशन समितीच्या पुनर्रचनेकडे दुर्लक्ष का, असा प्रश्नही या निवेदनाद्वारे उपस्थित केला आहे. डॉ. बाबासाहेब आंबेडकरांचे साहित्य लोकांपर्यंत पोहोचावे यासाठी तातडीने या समितीवर सदस्यांची नेमणूक करून समितीचे काम सुरू करावे, अशी मागणी प्रकाश बन्सोड यांनी केली आहे.