नागपुरात १८ लाखांवर नागरिकांना डोस

लोकमत न्यूज नेटवर्क

नागपूर : कोविड प्रतिबंधात्मक लसीकरण कार्यक्रमांतर्गत नागपूर शहरात पहिला आणि दुसरा डोज मिळून एकूण १८२६०५२ डोस देण्यात आले आहेत. १३ सप्टेंबरपर्यंत शहरातील १२,७४,९३७ नागरिकांनी पहिला तर ५,५१,११५ नागरिकांनी दुसरा डोस घेतला आहे.

मनपासह शासकीय व खासगी केंद्रांमधून लसीचे डोस देण्यात आले आहेत. कोरोनाचा संक्रमण रोखण्यासाठी लसीकरण मोहीम राबविली जात आहे. शहरातील १८ वर्षावरील प्रत्येक व्यक्तीला लस मिळावी. यासाठी मनपाद्वारे विविध उपक्रमही राबविले जात आहे.

लसीकरण आपल्या दारी या उपक्रमांतर्गत मनपाची आरोग्य चमू झोपडपट्टी भागांमध्ये जाऊन नागरिकांचे त्यांच्या घरी लसीकरण करीत आहे.

नागपुरात टप्प्याटप्प्याने लसीकरण सुरू करण्यात आले. प्रथम चरणात आरोग्य कर्मचारी आणि फ्रंट लाईन वर्कर, दुसऱ्या चरणात ६० वर्षावरील ज्येष्ठ नागरिक व ४५ वर्षावरील गंभीर आजार असणारे, तिसऱ्या टप्प्यात ४५ वर्षावरील सर्व व्यक्ती, चौथ्या टप्प्यात ३० वर्षावरील सर्व व्यक्ती तर पाचव्या टप्प्यात १८ वर्षावरील सर्व व्यक्तींचे लसीकरण सुरू करण्यात आले.

प्रारंभी शहरात फक्त चार केंद्रावर लसीकरण सुरू होते. आज १६० पेक्षा अधिक केंद्र आहेत.. गर्दीर्चे योग्य नियोजन आणि व्यापक जनजागृतीमुळे नागपूर शहराने लसीकरणाच्या पहिला डोसचा १० लाखांचा टप्पा ५ ऑगस्ट रोजी पार केला. तर आज दोन्ही डोसचा आकडा १८ लाखांच्यावर पोहोचला आहे. योग्य नियोजनामुळे नागपुरातील लसीकरण उद्दिष्टपूर्तीकडे जात असल्याचे महापौर दयाशंकर तिवारी व आयुक्त राधाकृष्णन बी. यांनी सांगितले.

.....

विविध गटातील लसीकरण

आरोग्य कर्मचारी- ७५४९६

फ्रंट लाईन वर्कर -९२३१२

१८ ते ४४ वर्ष वयोगट-७११६७९

४५ ते ६० वर्ष वयोगट- ४४३१३८

४५ ते ६० वर्ष वयोगट(आजार[)- १३१५६२

६० वर्षावरील -३७१८६५

एकूण -१८२६०५२ (पहिला व दुसरा डोस )

...