डेंग्यूचा ‘डंख’ करतोय मुलांना बेजार!

लोकमत न्यूज नेटवर्क

उमरेड : कोरोनाच्या तिसऱ्या लाटेनंतर नागरिकांनी जरासा उसासा घेतला असला तरी आजघडीला अनेक कुटुंबातील सदस्यांना डेंग्यूचा डंख भेडसावत आहे. विशेषत: यामध्ये मुलांची संख्या अधिक आढळत असून, डेंग्यूचा आजार मुलांना बेजार करीत आहे.

उमरेड शहरात शंभरावर खासगी रुग्णालये आहेत. यापैकी बहुतांश रुग्णालयात दिवसभरात डझनभर डेंग्यू रुग्ण उपचारांसाठी येत आहेत. मागील काही आठवड्यांपासून ही रुग्णसंख्या वाढतीवर असून शहरासह गावखेड्यातील रुग्णसुद्धा मोठ्या प्रमाणावर आहेत.

नागरिकांनी पावसाळा सुरू होण्यापूर्वी आणि नंतरही स्वच्छतेकडे दुर्लक्ष केले. या दुर्लक्षितपणामुळेसुद्धा यंदा मागील काही वर्षांनंतर डेंग्यूचा आजार चांगलाच बोकाळलेला दिसत आहे. नागरिकांनी सतर्कता बाळगावी. विशेषत: अंगदुखी, थंडी लागून ताप येणे, अशक्तपणा जाणवत असल्यास वेळीच औषधोपचारासाठी डॉक्टरांचा सल्ला घ्यावा, असे आवाहन केले जात आहे. नगरपालिका प्रशासनाने मोठ्या प्रमाणावर फाॅगिंग मशीनद्वारे धुरळणी सुविधा उपलब्ध करावी, अशी नागरिकांची मागणी आहे.