ब्लॅक स्पॉट बनलेला सदर उड्डाणपूलाचा कट बंद करा

प्रभाव लोकमतचा

नागपूर : ब्लॅक स्पॉट बनलेला सदर उड्डाण पुलाच्या कटची समस्या गांभीर्याने घेत खासदार रस्ते सुरक्षा समितीने या भागाचे निरीक्षण केले. समितीने सदर उड्डाण पुलाच्या मॉयलच्या गेटजवळील कट बंद करण्याची शिफारस केली आहे.

जुना काटोल नाका चौकापासून सदर उड्डाण पुलावर जाताना मॉयल गेट हाऊस गेटसमोरील कटमुळे अपघाताच्या वाढत्या शक्यतेवर लोकमतने २६ डिसेंबरला ‘ब्लॅक स्पॉट बनला सदर उड्डाण पुलाचा कट’ या शिर्षकाखाली बातमी प्रकाशित केली होती. त्यानंतर संबंधित विभागासह खासदार सदस्य रस्ते सुरक्षा समितीने ही बाब गांभीर्याने घेतली. केंद्रीय रस्ते वाहतूक व महामार्ग मंत्री नितीन गडकरी यांनी ही समस्या सोडविण्यासाठी योग्य पाऊले उचलण्याचे निर्देश संबंधितांना दिले होते. याच शृंखलेत शनिवारी रस्ते सुरक्षा समितीचे सदस्य चंद्रशेखर मोहिते यांच्यासह वाहतूक विभागाच्या अधिकाऱ्यांनी या भागाचे निरीक्षण करून समस्या समजावून घेतल्या.

समितीने मॉयल गेस्ट हाऊस गेटसमोरील कट बंद करण्यासह झाडे स्थानांतरित करण्याची आणि ‘वाहने हळू चालवा’ बोर्ड लावण्याची शिफारस केली आहे. या प्रसंगी पोलीस उपायुक्तांचे (वाहतूक) रीडर पोलीस निरीक्षक दीपक गोसावी, अपघात सेलचे हवालदार मंगेश देशमुख, शिपाई हरीश बावणे, सक्करदरा झोनच्या वाहतूक शाखेचे शिपाई कार्तिक मडगुलवार उपस्थित होते.

चंद्रशेखर मोहिते यांनी मनपाचे वाहतूक अभियंता शकील नियाजी यांना पत्र लिहून जुना काटोल नाका चौकातून सदर उड्डाण पुलावर जाताना मॉयल गेस्ट हाऊस गेटसमोरील कट त्वरित बंद करण्याची शिफारस केली आहे. तसेच गेटसमोरील सर्व्हिस रोडदरम्यानची दोन झाडे वाहतुकीसाठी अपघाताचे स्थळ असल्याने स्थानांतरित करण्याची गरज असल्याचे सांगितले आहे.

याशिवाय समितीने सक्करदरा वाहतूक परिमंडळांतर्गत येणाऱ्या ब्लॅक स्पॉटचे निरीक्षण केले. यामध्ये शीतला माता चौक, दिघोरी चौक, चामट चक्की चौक, दिघोरी टेलिफोन चौक, खरबी चौक, वाठोडा चौक, कबाडी शॉपसमोरील ब्लॅक स्पॉटचा समावेश आहे. निरीक्षणानंतर संबंधित ब्लॅक स्पॉटवर कोणते उपाय करता येतील, याचा अहवाल वाहतूक विभागाला सोपविला आहे.