कोरोनात अमरावतीने नागपूरला पुन्हा टाकले मागे

नागपूर : विदर्भात रुग्णसंख्येचा वेग कमालीचा वाढला आहे. विशेष म्हणजे, कोरोनाचा ११ महिन्यांच्या काळात दुसऱ्यांदा दैनंदिन कोरोनाबाधित रुग्णसंख्येने अमरावतीने नागपूरला मागे टाकले. शनिवारी अमरावती जिह्यात ७२७, तर नागपूर जिल्ह्यात ७२५ रुग्णांची नोंद झाली. विदर्भात २,१८४ नव्या रुग्णांची भर पडली, तर २२ रुग्णांचे बळी गेले. रुग्णांची एकूण संख्या २,९६,०९५, तर मृत्यूची संख्या ७२०३ झाली.

विदर्भातील अकरा जिल्ह्यांपैकी नागपूर, अमरावती, वर्धा, बुलढाणा, यवतमाळ व अकोल्यात रुग्णांची संख्या थोड्या अधिक फरकाने पुन्हा वाढताना दिसून येत आहे. विशेष म्हणजे, अमरावती जिल्ह्याने आज रुग्णसंख्येचा उच्चांक गाठला. ७२७ नव्या रुग्णांची नोंद झाली असून, सात रुग्णांचा मृत्यू झाला. रुग्णांची एकूण संख्या २८,८१५, तर मृतांची संख्या ४६० झाली. सध्या ३,६१६ रुग्ण उपचाराखाली आहेत. नागपूर जिल्ह्यात ७२५ रुग्णांची नोंद व सहा रुग्णांचे मृत्यू झाले. बाधितांची एकूण संख्या १,४२,५०७, तर बळींची संख्या ४,२६७वर पोहोचली. ५,८३४ कोरोनाचे रुग्ण सक्रिय आहेत. शुक्रवारच्या तुलनेत रुग्ण व मृत्यूच्या संख्येत किंचित घट आली. भंडारा जिल्ह्यात आज २० रुग्ण, वर्धा जिल्ह्यात ५६ रुग्ण व २ मृत्यू, गोंदिया जिल्ह्यात पाच रुग्ण, गडचिरोली जिल्ह्यात तीन, चंद्रपूर जिल्ह्यात २२, अकोला जिल्ह्यात १७३ रुग्ण व २ मृत्यू, यवतमाळ जिल्ह्यात १४५ रुग्ण व २ मृत्यू, बुलढाणा जिल्ह्यात २१५ रुग्ण व ३ मृत्यू, तर वाशिम जिल्ह्यात ९३ नव्या रुग्णांची भर पडली.