कोरोना वाढला, एसटीचे प्रवासी घटले ()

नागपूर : कोरोनाचे रुग्ण वाढत असल्यामुळे एसटी महामंडळाच्या बसेसवर विपरीत परिणाम पडला आहे. कोरोनाच्या पूर्वी नागपूर विभागात ४४५ बसेस चालविण्यात येत होत्या. कोरोनाच्या काळात १५० बसेस चालविण्यात आल्या. अनलॉकच्या प्रक्रियेनंतर ४०० बसेसद्वारे प्रवाशांची वाहतूक करण्यात येत होती. परंतु आता कोरोनाचे रुग्ण पुन्हा वाढल्यामुळे एसटीच्या प्रवाशांची संख्या घटली आहे. अधिकाऱ्यांनी दिलेल्या माहितीनुसार कोरोनाच्या पूर्वी फेब्रुवारी २०२० मध्ये दररोज सरासरी १ लाख ८० हजार प्रवाशांनी प्रवास केला. कोरोना सुरु असताना केवळ १२ हजार ३०० प्रवाशांनी एसटी बसने प्रवास केला. कोरोनाच्या रुग्णांची संख्या कमी झाल्यानंतर बसेसची संख्या वाढविण्यात आल्यामुळे जानेवारी २०२१ मध्ये विभागात दररोज सरासरी १ लाख प्रवाशांनी प्रवास केला. नागपूर विभागाने पुणे मार्गावर शिवशाही बसेसची संख्या वाढवून २ वरून ६ केली. परंतु आता पुन्हा कोरोनाची लाट आल्यामुळे एसटीच्या प्रवासी संख्येत घट झाली आहे.

आकडेवारी

कोरोनापूर्वी चालविण्यात येणाऱ्या बसेस : ४४५

कोरोना सुरू असताना चालविलेल्या बसेस : १५०

सध्या सुरु असलेल्या बसेस : ४००

बसेसमध्ये निम्मे प्रवासीच

एसटी महामंडळाच्या नागपूर विभागातील अधिकाऱ्यांनी दिलेल्या माहितीनुसार कोरोनाच्या रुग्णांची संख्या वाढल्यामुळे पुणे आणि औरंगाबादला जाणाऱ्या बसेस अमरावती शहरात प्रवेश करण्याऐवजी बायपासने जात आहेत. एवढेच नव्हे तर अमरावतीच्या बसेसमध्ये केवळ ५० टक्के प्रवाशांनाच प्रवासाची परवानगी देण्यात येत आहे. कोरोनाचे रुग्ण वाढल्यामुळे शाळा, महाविद्यालय बंद झाले आणि एसटी महामंडळाच्या नागपूर विभागाचे मोठे नुकसान झाले आहे. महामंडळाने आपल्या ३० शालेय बस बंद केल्या आहेत.

मास्क नाही, शारीरिक अंतरही नाही

नागपूरसह विदर्भात कोरोनाच्या रुग्णांची संख्या वाढत आहे. यामुळे प्रशासनाच्या वतीने खबरदारी घेण्यात येत आहे. एसटी महामंडळाच्या वतीनेही प्रवाशांमध्ये जनजागृती करण्यात येत आहे. परंतु प्रवाशांवर त्याचा फारसा परिणाम होताना दिसत नाही. सोमवारी एसटी महामंडळाच्या गणेशपेठ बसस्थानकावर अनेक प्रवासी विनामास्क फिरत असल्याचे दिसले. फिजिकल डिस्टन्सिंगचेही येथे पालन होत नसल्याचे चित्र होते.

............