कोरोनामुळे ५५ टक्क्याने रुग्णसंख्येत घट

सुमेध वाघमारे

नागपूर : कोरोनाच्या प्रादुर्भावाला सुरुवात होताच संसर्गाचा भीतीने मेडिकलमधील‘ओपीडी’तील रुग्णांची गर्दी अचानक कमी झाली. मार्च २०१९ मध्ये ८० हजार रुग्णांची असलेली ओपीडी मार्च २०२०मध्ये ५९ हजारांवर आली. कोरोनाचा जसजसा वेग वाढत गेला तसतशी रुग्णांची संख्या आणखी कमी होत गेली. एकूणच २०१९च्या तुलनेत २०२० मध्ये ५५.८४ टक्क्याने रुग्णसंख्येत घट आली. मात्र आता कोरोनाबाधितांची संख्या कमी होताच पुन्हा नॉनकोविडची रुग्णसेवा पूर्वदावर येऊ पाहत आहे. दररोज २ हजारावर रुग्णांची वैद्यकीय तपासणी होत आहे.

‘लॉकडाऊन’च्या काळात रहदारीची साधने बंद होती. अत्यावश्यक सेवेमध्ये रुग्णसेवेचा समावेश असला तरी कोरोनाचा दहशतीमुळे शासकीय रुग्णालयातून उपचार घेणे अनेकांनी टाळले. या काळात रुग्णालयांमध्ये रुग्णांच्या गर्दीमध्ये लक्षणीय कमी दिसून आली. शासकीय वैद्यकीय महाविद्यालय व रुग्णालयाच्या (मेडिकल) बाह्यरुग्ण विभागात (ओपीडी) २०१९ मध्ये एकूण ९४७०९७ रुग्णांनी उपचार घेतले असता २०२० मध्ये यात घट होऊन ही रुग्णसंख्या ५२८९४९ वर आली. रोज ३ हजारांवर जाणारी ओपीडी १ हजार व त्यापेक्षा खाली आली. या काळात काही रुग्णांनी घरगुती उपचारावर तर काहींनी डॉक्टरांशी टेलिफोनिक संपर्क साधून उपचार घेतले. परंतु ऑक्टोबर २०२० पासून कोरोनाबाधितांची संख्या कमी होऊ लागताच इतर रुग्णांची संख्या वाढू लागली. विशेष म्हणजे, डिसेंबर २०२० मध्ये रुग्णांची संख्या ५४ हजारांवर गेली.

-त्वचारोग विभागात रुग्णांची गर्दी कायम

मागील वर्षी मेडिकलच्या सर्वच विभागात ३० ते ५० टक्क्याने रुग्णांत घट आली असताना त्वचा रोग विभागात मात्र, रुग्णांची गर्दी कायम होती. २०१९ मध्ये १३४००१ रुग्णांनी तर २०२०मध्ये ८५१७८ रुग्णांनी उपचार घेतले. कोरोनाचा फटका मेडिकलचा आकस्मिक विभाग म्हणजे ‘कॅज्युअल्टी’लाही बसला. २०१९ मध्ये येथे ९१९०५ रुग्णांची नोंद झाली असताना २०२०मध्ये ही संख्या २०७५२ वर आली.

-५० टक्क्याने शस्त्रक्रियाही झाल्यात कमी

कोविडचा फटका शस्त्रक्रियांनाही बसला. २०१९ मध्ये ७१४७३ जनरल सर्जरी झाल्या असताना २०२० मध्ये ३५७६६ शस्त्रक्रिया होऊ शकल्या. एकूण ५० टक्क्याने शस्त्रक्रिया कमी झाल्या. मात्र मागील डिसेंबर महिन्यात शस्त्रक्रियांची संख्या वाढली आहे. महिन्याभरात ३५२१ शस्त्रक्रिया झाल्या आहेत.

-

२०१९ २०२०

जानेवारी ७६५७३ ७७३३७

फेब्रुवारी ७८४५१ ७६११४

मार्च ८०१९५ ५९५०८

एप्रिल ७०४४७ २१७६९

मे ७२२८९ २६२७१

जून ७८३५० ३६८१९

जुलै ८३०५६ ४५४९३

आॅगस्ट ८०४९३ ३४०६२

सप्टेंबर ८०९६० ३३०५०

ऑक्टोबर ७८४४९ ३४२५७

नोव्हेंबर ८६७७३ ३६७१९

डिसेंबर ८१०६१ ४७५५०