कॉमर्सने मोडला सायन्सचा रेकॉर्ड

नागपूर : अकरावीच्या प्रवेशाची पहिली यादी प्रसिद्ध झाली. शहरातील काही नामांकित महाविद्यालयांतील शाखानिहाय कटऑफ लक्षात घेता, यंदा कॉमर्सने सायन्सचा रेकॉर्ड मोडला आहे. त्याखालोखाल आर्ट्सचा कटऑफ वाढल्याचे निदर्शनास आले आहे. डॉ. आंबेडकर कॉलेजमध्ये कॉमर्सचा कटऑफ ९६.२ राहिला. एलएडी कॉलेजचा आर्ट्सचा कटऑफ ४७६ राहिला, तर सायन्सचा आंबेडकर कॉलेजचा कटऑफ ४६६ राहिला. शनिवारी प्रवेशासाठी महाविद्यालयांमध्ये विद्यार्थी-पालकांची गर्दी दिसून आली. शनिवारपर्यंत ७७५२ विद्यार्थ्यांनी प्रवेश निश्चित केले.

केंद्रीय प्रवेश समितीची अकरावीच्या प्रवेशाची पहिली यादी प्रसिद्ध झाली. यात १४२४५ विद्यार्थ्यांची निवड झाली. आतापर्यंत सर्वाधिक ३९६७ प्रवेश विज्ञान शाखेचे झाले आहेत. मुंबई उच्च न्यायालयाने अकरावीची सीईटी रद्द करून ६ आठवड्यांत प्रवेश प्रक्रिया पूर्ण करण्याचे निर्देश शिक्षण विभागाला दिले होते. त्यानुसार महापालिकेच्या हद्दीत होणाऱ्या अकरावीच्या प्रवेशासाठी केंद्रीय प्रवेश समितीने प्रक्रिया सुरू केली. शुक्रवारी प्रवेश प्रक्रियेची पहिली यादी प्रसिद्ध करण्यात आली. शहरातील २१७ ज्युनि. कॉलेजमध्ये अकरावीच्या ५८७९५ जागा आहेत. त्यासाठी २२ ऑगस्टपर्यंत २६१७६ विद्यार्थ्यांनी नोंदणी केली आहे. २३०७४ विद्यार्थ्यांनी भाग १ भरला असून, १८९८४ विद्यार्थ्यांनी ऑप्शन भरलेले आहे. शुक्रवारपासून प्रवेशाला सुरुवात झाली. पहिल्या दिवशी २७६६ प्रवेश निश्चित झाले होते. दुसऱ्या दिवशी ही संख्या ७७५२ वर पोहोचली.

- शाखानिहाय निश्चित झालेले प्रवेश

शाखा कॅप राउंड मॅनेजमेंट कोटा

आर्ट ७७१ १३६

कॉमर्स १७५६ २०५

सायन्स ३९६७ ३८७

एमसीव्हीसी ४६७ ६३

एकूण ६९६१ ७९१

- शाखानिहाय कटऑफ

डॉ. आंबेडकर कॉलेज कॉमर्स कटऑफ - ९६.२

एलएडी कॉलेज आर्टचा कटऑफ - ९५.२

डॉ. आंबेडकर कॉलेज सायन्सचा कटऑफ - ९३.२