मानकापुरात घरफोडी

नागपूर - मानकापूरातील वाट ले-आऊटमध्ये राहणारे मकसूद मन्सूर निमचवाला (वय ४०) यांच्या घराच्या दाराचे कुलूप तोडून चोरट्यांनी १ लाख ८० हजाराची रोकड तसेच सोन्याचे दागिन्यांसह पावणेपाच लाखाचा ऐवज चोरून नेला. निमचवाला ३१ डिसेंबरला रात्री सहपरिवार औरंगाबाद येथे गेले होते. सोमवारी परत आले तेव्हा त्यांच्या घराच्या दाराचे कुलूप तुटून दिसले. चोरट्यांनी घरातील सर्व साहित्य अस्ताव्यस्त करून कपाटात ठेवलेली १ लाख ८० हजाराची रोकड तसेच सोन्याचे दागिने असा एकूण ४ लाख ६५ हजाराचा ऐवज चोरून नेला. या घटनेची माहिती मिळाल्यानंतर मानकापूर पोलीस निमचवाला यांच्या निवासस्थानी पोहचले. त्यांनी आजूबाजूच्या सीसीटीव्हीतून चोरट्यांचा छडा लावण्यासाठी धागेदोरे मिळवले. निमचवाला यांच्या तक्रारीवरून घरफोडीचा गुन्हा दाखल करण्यात आला असून, चोरट्यांचा शोध घेतला जात आहे.

----