प्रतिकार केल्यामुळेच खून

बलात्काराचा विरोध करीत आरडओरड केल्याने आरोपी स्कूल बस चालकाने विद्यार्थिनीचा गळा आवळून खून केल्याची बाब आरोपी जीवन छपाने याने कबूल केली.

प्रेमी असल्याचे सांगून केली दिशाभूल :
आरोपीला २१ पर्यंत पोलीस कोठडी
नागपूर : बलात्काराचा विरोध करीत आरडओरड केल्याने आरोपी स्कूल बस चालकाने विद्यार्थिनीचा गळा आवळून खून केल्याची बाब आरोपी जीवन छपाने याने कबूल केली. सुरुवातीला त्याने विद्यार्थिनीशी प्रेम संबंध असल्याची खोटी कहाणी सांगून पोलिसांची दिशाभूल करण्याचा प्रयत्न केला. परंतु अखेर खरा प्रकार समोर आला.
बुधवारी रात्री इसासनी येथे २० वर्षीय विद्यार्थिनीचा मृतदेह आढळून आला. तपासादरम्यान मृतदेहाची ओळख पटली. कुटुंबीयांकडून मिळालेल्या माहितीच्या आधारावर जीवनला ताब्यात घेण्यात आले. त्यानंतर खरा प्रकार उघडकीस आला.
मृत विद्यार्थिनीचे वडील मजुरी करतात. त्यांना तीन मुली आहेत. मोठ्या मुलीचे लग्न झाले आहे. मृत विद्यार्थिनी दुसऱ्या नंबरची होती तर तिसऱ्या क्रमांकाची मुलगी सातव्या वर्गात शिकते. आरोपी जीवन हा मृताच्या लहान बहिणीच्या स्कूल बसचा ड्रायव्हर आहे. लहान बहिणीला घेण्यासाठी तो तिच्या घरी यायचा.
मृत विद्यार्थिनी आणि तिची मोठी बहीण या लहानपणापासूनच मामाच्या घरी राहत होत्या. आईवडिलांकडे त्या कधी-कधी यायच्या. याच दरम्यान जीवनची विद्यार्थिनीवर नजर पडली. जीवन हा दारुडा आहे. त्याचे तिसरे लग्न झाले होते. पत्नी सुद्धा रक्षाबंधनापासून परतली नाही. काही दिवसांपूर्वीच मृत विद्यार्थिनी आईवडिलांकडे राहायला आली होती. ती गुरुवारी घरी गणपतीची स्थापना करणार होती. १५ सप्टेंबरला ‘मंगळागौरी’ची पूजा होती. त्यासाठी विद्यार्थिनी बेल व फूल आणण्यासाठी गोपालनगर येथील मामाच्या घरी गेली होती. सायंकाळी ती आपल्या घरी जाण्यासाठी निघाली. मावशीने तिला जाण्यासाठी पैसे दिले. बसमध्ये बसून ती रात्री ८.३० वाजता जयताळा बस स्टॉपवर पोहोचली. जीवन तिथे अगोदरपासूनच वाट पाहत उभा होता. तो तिला मिहान परिसरात घेऊन गेला.
बसमधून उतरताच जीवन तिच्याशी बळजबरी करू लागला. विद्यार्थिनी आरडाओरड करीत स्वत:ला वाचवण्याचा प्रयत्न करू लागली. तिचे ओरडणे बंद करण्यासाठी जीवनने तिचा गळा दाबून खून केला.
विद्यार्थिनीच्या खुनात जीवनसोबतच त्याच्या मित्राचाही हात असल्याची शंका आहे. विद्यार्थिनी ही कडक स्वभावाची होती. तिच्या मित्रांची संख्या सुद्धा खूप कमी आहे. त्यामुळे ती स्वत:च्या मर्जीने जीवनसोबत गेली असावी, ही गोष्ट तिच्या कुटुंबीयांना मान्य नाही. त्यांना शंका आहे की, जीवनने आपल्या साथीदारांची मदत नक्कीच घेतली असावी. सोनेगाव पोलिसांनी गुरुवारी जीवनला न्यायालयात सादर करून २१ सप्टेंबरपर्यंत पोलीस कोठडीत घेतले आहे. (प्रतिनिधी)

मदतीचे आमिष दाखविले
मृत विद्यार्थिनी ही गुरुवारी गणपतीची स्थापना करणार होती. परंतु तिच्याकडे पैशाची अडचण होती. तिने जयताळा बसस्टॉपवर जीवनला ही गोष्ट सांगितली. जीवनने तिला आर्थिक मदत करण्याची इच्छा व्यक्त केली. तसेच पैसे घेण्यासाठी सोबत चलण्यास सांगितले. विद्यार्थिनी मदत मिळण्याच्या अपेक्षेने त्याच्यासोबत गेली.

आईने केली होती तक्रार
विद्यार्थिनीच्या आईने दोन महिन्यांपूर्वी दारूच्या नशेत स्कूल बस चालवल्याबाबत जीवनची तक्रार केली होती. दिवाळीनंतर दुसरा ड्रायव्हर ठेवण्याचे आश्वासन मिळाल्याने ती गप्प बसली. याचा बदला घेण्याच्या उद्देशाने जीवनने विद्यार्थिनीचा खून केला असावा, अशी शंकाही व्यक्त केली जात आहे. या प्रकरणामुळे शाळेचा निष्काळजीपणा सुद्धा उघडकीस आला आहे.