बालजगत : चॉकलेट अन् बिस्किटचा अहेर आणि वरातीत नृत्य
नागपूर : मराठी गीतांची वाजंत्री...वर पक्षाकडून निघालेली वरात अन् वरातीत गीतांचा ठेका पकडून नाचणारे चिमुकले...वरातीत त्यांचे पालकही सहभागी झालेले...सारे काही सुरळीत सुरू होते. कुणाचा रुसवा नाही की, फुगवा नाही. वरपक्षाकडील मंडळीही वधुपक्षाच्या लोकांना मदत करणारीच होती. मंगलाष्टके झालीत, सुलग्न लागले आणि बाहुला-बाहुलीच्यावतीने मस्तपैकी उखाण्यांचीही मैफिल रंगली. यात सारेच सहभागी झाले. हसत -खेळत बाहुला-बाहुलीचे लग्न झाले आणि नांदा सौख्यभरे म्हणत चिमुकल्यांनी त्यांना आशीर्वाद दिले. धम्माल करीत हा विवाह सोहळा आनंदात पार पडला. दीनदयाल शोध संस्थान, बालजगतच्या उन्हाळी शिबिरात हा सोहळा तब्बल हजारावर मुले आणि पालकांच्या साक्षीने पार पडला. हा कार्यक्रम बालजगत, लक्ष्मीनगरच्या आवारात आयोजित करण्यात आला. याप्रसंगी अख्खे बालजगत सजविण्यात आले. वरपक्षाला कुठलाही त्रास नको म्हणून जागोजागी सर्व व्यवस्था सज्ज होत्या. सध्या उन्हाचा तडाखा वाढल्याने मुद्दामच हा सोहळा सायंकाळी आयोजित करण्यात आला. विवाहासाठी बालजगतच्या हिरवळीवर छानसा स्टेज तयार करण्यात आला होता. वय वर्षे २ ते ५ हा शिशुरंजन आणि ५ ते १० हा बालरंजन असे दोन समूह तयार करण्यात आले होते. शिशुरंजनने वधु पक्षाची जय्यत तयारी केली होती. नवरदेवासाठी पालखी तयार करण्यात आली. पालखीतून बाहेर पाहताना कधी-कधी नवरदेवाचा तोल जात होता पण त्याला सार्यांनीच सांभाळले. वरपक्षाकडचे ताई - दादाही वधुपक्षाच्या मदतीसाठी सज्ज असल्याने कुठेही - काहीही गोंधळ झाला नाही. आई, बाबा आणि आजी- आजोबांसाठी या सोहळ्यात विशेष सोय करण्यात आली होती. मंगलाष्टके झाली, बँड वाजला, नृत्य करण्यात आले. यात सारे पालकही वय विसरून सहभागी झाले. पण त्यानंतर अहेर करण्यात आला. अहेरात चॉकलेट आणि बिस्कीट होते. अहेराचे वितरण सुरू असताना नवरदेवाकडच्या काही मंडळींना चॉकलेट मिळालेच नाही. बिस्किट मिळाले. हा अर्धाच अहेर मिळालेला पाहून नवरदेवाकडची काही मंडळी रुसली. आता मोठा पेच पडला. कारण अहेराची सामग्री संपली होती. पण वधुपक्षाने हार मानली नाही. त्वरित वधुपक्षाचे पालकत्व स्वीकारलेल्या जगदीश सुकळीकरांना साकडे टाकले आणि त्यांनी पुन्हा व्यवस्था केली. जगदीश सुकळीकरांच्या आशीर्वादाने मग सारेच सुरळीत झाले. सर्वांनाच चॉकलेट मिळाले. त्यानंतर आग्रहाने सगळ्यांना नाश्ता देण्यात आला. या सोहळ्यासाठी बालजगतचे प्रांगण फुलले होते. मुले-मुली आकर्षक रंगीबेरंगी पोशाख आणि सुगंधी अत्तर लावून आले होते. लहान मुलांच्या या लुटुपूटुच्या लग्नात मोठेही हरविले. अनेकांना त्यांच्याही लहानपणीचे खेळ आठवले. (प्रतिनिधी)