नागपूर : भेटीच्या बहाण्याने अल्पवयीन मुलीला आपल्या ऑटोत बसवून वाडी परिसरातील एका घरात नेऊन तिच्यावर बलात्कार करणाऱ्या आरोपीला सीताबर्डी पोलिसांनी अटक केली आहे. अक्षय विनोद भेसारे (२५, रा. गौतमनगर, बेझनबाग, ख्रिश्चन कॉलनी, जरीपटका) असे अटक करण्यात आलेल्या आरोपी ऑटोचालकाचे नाव आहे.
बेझनबागमध्ये राहणारी पीडित अल्पवयीन मुलगी एका रुग्णालयात नोकरी करते. ती ऑटोने रुग्णालयात ये-जा करीत होती. महिनाभरापूर्वी तिची आरोपी अक्षयशी ओळख झाली. त्याने अल्पवयीन मुलीला त्याचा नंबर दिला. कधीही आवश्यकता असल्यास फोन करण्यास सांगितले. त्यामुळे रात्री ती ऑटोसाठी अक्षयला फोन करीत होती. त्यातून त्यांची मैत्री झाली. त्याने अल्पवयीन मुलीला लवकरच त्याच्या लहान बहिणीचे लग्न होणार असल्याचे सांगितले. त्याने बहीण आणि कुटुंबीयांची तिच्याशी ओळख करून देण्याची इच्छा असल्याचे सांगितले. वारंवार आग्रह केल्याने अल्पवयीन मुलगी त्याच्या घरी जाण्यासाठी तयार झाली.
१७ फेब्रुवारीला दुपारी १ वाजता अक्षयने इटरर्निटी मॉलजवळून तिला त्याच्या ऑटोत बसवले. तो तिला वाडी परिसरातील एका घरात घेऊन गेला. तेथे तिला शारीरिक संबंधाची मागणी केली. तिने नकार देताच तिला धमकी देऊन त्याने जबरदस्तीने शारीरिक संबंध प्रस्थापित केले. तसेच, याबाबत कोणालाही काही सांगितल्यास तिला जीवे मारण्याची धमकी दिली.
अल्पवयीन मुलीने कुटुंबीयांना घटनेची माहिती दिल्यानंतर सीताबर्डी ठाण्यात अक्षय विरुद्ध कलम ३४२, ३६३, ३६६ (अ), ३७६, सहकलम ४, ८, १२ पोक्सो कायद्यानुसार गुन्हा दाखल करण्यात आला होता. या प्रकरणी सीताबर्डी पोलिसांनी आरोपी अक्षयला अटक करून त्याच्या ताब्यातून २ लाख रुपये किमतीचा ऑटो जप्त केला आहे.