पावसाचे आगमन, शेतकऱ्यांच्या आशा पल्लवित

नागपूर : मागील चार दिवसांपासून खोळंबलेल्या पावसाचे पुन्हा नागपूरसह विदर्भात आगमन झाले. यामुळे शेतकऱ्यांच्या आशा पल्लवित झाल्या आहेत. मागील २४ तासात विदर्भात अनेक ठिकाणी पावसाची नोंद झाली आहे.

दरम्यान, दुबार पेरणीचे संकट ओढवण्याची भीती असलेल्या शेतकऱ्यांना या पावसाने दिलासा दिला आहे. हवामान विभागाने नागपूरसह विदर्भातील वर्धा, भंडारा, गोंदिया, चंद्रपूर आणि गडचिरोली या जिल्ह्यात पुढील तीन दिवस पावसाचा इशारा दिला आहे. या सोबतच अन्य जिल्ह्यातही तुरळक पावसाचा अंदाज व्यक्त केला आहे.

नागपुरात २४ तासात झालेल्या पावसामुळे तापमानही बरेच घटले आहे. बुधवारी ५.१ अंश सेल्सिअसने तापमानात घट होऊन ते ३१.१ अंश सेल्सिअस नोंदविले गेले. मंगळवारी रात्री आणि बुधवारी दुपारी पाऊस आल्याने पारा खालावला आहे. सकाळची आर्द्रता ९८ टक्के तर सायंकाळी ती ८८ टक्के नोंदविली गेली.

नागपूर शहरासह ग्रामीण भागातही दुपारी आणि रात्रीच्या पावसाची नोंद झाली. यामुळे शेतकरी पुन्हा खोळंबलेल्या पेरणीच्या कामी लागला आहे. विदर्भात मागील २४ तासात अमरावतीमध्ये ८.८ मिमी पाऊस पडला. चंद्रपूर ८.२, गडचिरोली ३.४, गोंदिया ७.२, नागपूर ६.४, वर्धा २.८ आणि वर्धा येथे २.८ तर यवतमाळात २ मिमी पावसाची नोंद घेण्यात आली.

...

विदर्भातील तापमान

जिल्हा : कमाल : किमान

अकोला : ३१.९ : २५.१

अमरावती : २९.० : २३.१

बुलडाणा : २९.० : २४.०

चंद्रपूर : ३१.२ : २३.२

गडचिरोली : २८.४ : २३.४

गोंदिया : २९.० : २३.०

नागपूर : ३१.१ : २४.२

वर्धा : २८.८ : २५.०

वाशिम : २९.० : २१.०

यवतमाळ : २५.५ : २३.५

...