मनपाच्या उपद्रव शोध पथकांनी केली ८८ सभागृहांची तपासणी
लोकमत न्यूज नेटवर्क
नागपूर : महापालिका प्रशासनाने लग्न समारंभासाठी जारी केलेल्या नियमावलीचे उल्लंघन केल्याने मनपाच्या उपद्रव शोध पथकाने गुरुवारी शहरातील चार मंगल कार्यालयावर कारवाई केली. त्यांच्याकडून ३५ हजार रुपयाचा दंड वसूल करण्यात आला आहे. तसेच सर्व झोनमधील ८८ सभागृहांची तपासणी करण्यात आली. आयुक्तांच्या निर्देशानुसार पथक प्रमुख वीरसेन तांबे यांच्या मार्गदर्शनात ही कारवाई करण्यात आली.
नेहरूनगर झोनअंतर्गत म्हाळगीनगर चौकातील बेसा पॉवर हाऊसजवळील एम्पोरियम हॉल, लकडगंज झोनअंतर्गत वर्धमाननगर येथील सात वचन लॉन, आसीनगर झोनमधील पॉवरग्रीड चौकातील जगत सेलिब्रेशन लॉन व मंगळवारी झोनमधील गोधनी रोडवरील गोविंद लॉनवर कारवाई करण्यात आली. निर्धारित क्षमतेपेक्षा जास्त वऱ्हाडी आढळल्याने दंड वसूल करण्यात आला. यापैकी एम्पोरियम हॉल व जगत सेलिब्रेशन लॉनकडून प्रत्येकी १५ हजार रुपये दंड तात्काळ वसूल करण्यात आला.
सात वचन लॉन कार्यालय बंद असल्याने त्यांना १५ हजार दंडाची नोटीस बजावली. तर गोधनी मार्गावरील गोविंद लॉनकडून ५ हजार रुपये दंड वसूल केला.
याशिवाय लक्ष्मीनगर झोनमधील १०, धरमपेठ १४, हनुमाननगर ९, धंतोली ११, नेहरूनगर ९, गांधीबाग ५, सतरंजीपुरा ४, लकडगंज ८, आसीनगर ८ व मंगळवारी झोनमधील १० अशा एकूण ८८ मंगल कार्यालयांची तपासणी करण्यात आली.