लर्निंग लायसन्सची परीक्षा देणाऱ्या अनधिकृत व्यक्तीवर कारवाई

नागपूर : कोरोनाच्या पार्श्वभूमीवर परिवहन विभागाने घरी बसून शिकाऊ अनुज्ञप्ती (लर्निंग लायसन्स) देण्याची सोय उपलब्ध करून दिली आहे. मात्र काही ठिकाणी शिकाऊ उमेदवाराऐवजी अनधिकृत व्यक्ती लर्निंग लायसन्सची परीक्षा देत असल्याच्या तक्रारी प्राप्त झाल्या आहेत. बोगस परीक्षार्थी लर्निंग लायसन्स काढत असल्यास त्यावर पोलीस कारवाई करण्यात येईल, असे प्रभारी उपप्रादेशिक परिवहन अधिकारी विनोद जाधव यांनी कळविले आहे. परंतु या संदर्भातील तक्रार करणार कोण, हा प्रश्न आहे.

मोटार वाहन कायद्यानुसार शिकाऊ अनुज्ञप्तीसाठी परीक्षा देणे आवश्यक आहे. संबंधित अर्जदारास वाहतूक नियमांचे, चिन्हांचे व वाहनचालकांच्या जबाबदारीचे महत्त्व सांगणारी ही परीक्षा असते. या प्रणालीचा वापर करतांनी पालकांनी त्यांच्या पाल्यांना परीक्षेचे महत्त्व पटवून दिल्यास, या प्रणालीचा गैरवापर होणार नाही, असे आवाहनही जाधव यांनी केले आहे. परंतु परीक्षा देणाऱ्यानेच अनधिकृत व्यक्तीची मदत घेतल्यास याची तक्रार करणार कोण, हा प्रश्न आहे.

-तर, लायसन्ससाठी कायमस्वरुपी अपात्र

या प्रकरणात दोषी आढळणारा अर्जदार मोटार वाहन कायद्यानुसार लायसन्ससाठी कायमस्वरुपी अपात्र ठरणार आहे. अशा कारवाई करण्याच्या सूचना अधिकाऱ्यांना देण्यात आल्या आहेत. याच बरोबर महा-ई-सेवा केंद्र, ड्रायव्हिंग स्कूल व इंटरनेट कॅफेचा गैरवापर करणाऱ्या संस्था विरुद्धही कारवाई करण्यात येणार आहे. नागरिकांनी गैरप्रकाराच्या विरोधात आरटीओ कार्यालयात तक्रार करावी, असे आवाहनही करण्यात आले आहे.