शहरात विनामास्क ३३ जणांवर कारवाई

लाेकमत न्यूज नेटवर्क

भिवापूर : काेराेनाबाधितांची वाढती रुग्णसंख्या लक्षात घेता प्रशासनाने कठोर पावले उचलण्यास सुरुवात केली आहे. प्रतिबंधात्मक उपाय म्हणून नगर पंचायतीच्या पथकाने साेमवारी (दि. २२) शहरात विनामास्क फिरणाऱ्या ३३ जणांवर दंडात्मक कारवाई करीत त्यांच्याकडून ६ हजार ६०० रुपयांचा दंड वसूल करण्यात आला. काेराेनावर नियंत्रण मिळविण्यासाठी नागरिकांनी सहकार्य करण्याचे आवाहन प्रशासनातर्फे करण्यात आले.

तहसीलदार अनिरुद्ध कांबळे यांनी तालुक्यात काेराेना नियंत्रणासाठी आवश्यक उपाययोजनांची अंमलबजावणी सुरू केली आहे. दरम्यान, मुख्याधिकारी सुवर्णा दखणे यांच्या मार्गदर्शनात नगर पंचायत पथकाने शहरात माेहीम राबविली. यात अनावश्यक गर्दी, फिजिकल डिस्टन्सिंग‌ व मास्क न वापरणाऱ्यांवर दंडात्मक कारवाई करण्यात आली. या पथकाने राष्ट्रीय मार्गावर ट्रॅव्हल्सची तपासणी केली तसेच विनामास्क फिरणाऱ्या ३३ जणांवर प्रत्येकी २०० रुपयेप्रमाणे दंड ठाेठावला. तसेच फिजिकल डिस्टन्सिंगच्या नियमावलीचे उल्लंघन केल्याप्रकरणी एका सभागृहावर दंडात्मक कारवाई करून दाेन हजाराचा दंड वसूल केला. या पथकात नगर पंचायत कर्मचारी परसराम वावरे, अशोक लांजेवार, राजू महाजन, सुनील कलसे, भगवान वाघमारे, रोशन गजभिये, संजय मेश्राम आदींचा समावेश होता.

....

नियमाचे उल्लंघन, सभागृहावर कारवाई

शहरातील एका सभागृहात साेमवारी लग्नकार्य होते. सभागृहात गर्दी कमी असली, तरी उपस्थितांमध्ये फिजिकल डिस्टन्सिंगचा बोजवारा उडाल्याचे चित्र हाेते. ही बाब नगर पंचायत पथकाच्या निदर्शनास येताच, मंगला कार्यालयावर नियमाचे उल्लंघन केल्यावरून २ हजार रुपयाचा दंड ठोठावला. मंगल कार्यालयांवर कारवाई होत असल्याने अनेकांनी शहरात आयोजित लग्नकार्य रद्द करून मूळ गावी लग्न उरकण्याचा कार्यक्रम सुरू केला आहे. साेमवारी शहरातील सभागृहात आयाेजित २-३ लग्न ऐनवेळी गावखेड्यात उरकण्यात आले, हे विशेष.

...

एकच ग्लास, चार जणांचा वापर

काेराेनाचा संसर्ग वाढत असतानाच सर्वाधिक धाेका शहरातील देशी दारू दुकानात आहे. येथे एकच ग्लास चक्क ४ ते ५ व्यक्ती वापरतात. त्यानंतर ताेच मद्याचा ग्लास पुढे अनेकांच्या तोंडाला लागत आहे. या ठिकाणी मास्क, फिजिकल डिस्टन्सिंगचा बोजवारा उडाल्याचे चित्र आहे. त्यामुळे दारूच्या दुकानातील गर्दीवर आळा काेण घालणार, हा प्रश्नच आहे.