१५८ अतिक्रमणांवर कारवाई

नागपूर : महानगरपालिकेच्या अतिक्रमण विरोधी पथकाने साेमवारी शहरातील विविध भागात १५८ अतिक्रमणांवर कारवाई केली. त्यामुळे संबंधित परिसरांनी मोकळा श्वास घेतला. दरम्यान, एकूण ३ हजार ७०० रुपये दंडही वसूल करण्यात आला.

लक्ष्मीनगर झाेनमध्ये माटे चौक, प्रतापनगर चौक ते जयताळा बार रोडवरील फुटपाथवरचे ३० अतिक्रमणे हटवण्यात आली. धरमपेठ झोनमध्ये रामनगर चौक, इंदिरा गांधी रुग्णालय, अभ्यंकरनगर चौक, बजाजनगर चौक व शंकरनगर चौक या भागातील २५ अतिक्रमणांवर कारवाई करण्यात आली. धंतोली झोनमध्ये घाट चौक, कॉटन मार्केट चौक व आग्याराम देवी चौक या परिसरातील २८ अतिक्रमणे हटवण्यात आली. त्यात आग्याराम देवी चौकाजवळील मूर्ती विक्रेत्यांचा समावेश आहे.

आसीनगर झोनमध्ये अशोक नगरातील राम मनोहर लोहिया वाचनालयाजवळील प्रल्हाद सहारे व कमला वासनकर यांनी गटर लाइनवर बांधलेली भिंत तोडण्यात आली. त्यानंतर कमाल चौक, इंदोरा चौक, टेका चौक ते कपीलनगर या रोडवरील ४० अतिक्रमणे पाडून १ ट्रक माल जप्त करण्यात आला. मंगळवारी झोनमध्ये गिट्टीखदान चौक, गोरेवाडा रोड व दुर्गानगर परिसरातील ३५ अतिक्रमणांवर कारवाई करण्यात आली.