नागपूर : ‘फेसबुक’वर झालेल्या मैत्रीतून दोन तरुणांनी दोन वेगवेगळ्या घटनांमध्ये अल्पवयीन मुलींवर अत्याचार केले. एका प्रकरणात दिवसाढवळ्या अत्याचार करण्यात आले, तर दुसऱ्या प्रकरणात मुलीचे अपहरण करून अत्याचार झाले. गिट्टीखदान व सेमिनरी हिल्स पोलीस ठाण्याच्या हद्दीत या दोन्ही घटना घडल्या आहेत.
सेमिनरी हिल्सच्या परिसरात एका तरुणाने फेसबुक फ्रेंड असलेल्या अल्पवयीन मुलीवर जबरदस्ती करत शारीरिक अत्याचार केले. या प्रकरणात आरोपीला अटक करण्यात आली आहे. हिंगणा येथील अभिषेक प्रेमानंद इंदूरकर (२०) याची १७ वर्षीय अल्पवयीन मुलीसोबत दोन वर्षांपूर्वी फेसबुकवर मैत्री झाली होती. ही मैत्री काही दिवस टिकली. नंतर दोघांमधील बोलणे बंद झाले. रविवारी दुपारी सेमिनरी हिल्स येथील एका धार्मिक ठिकाणी अल्पवयीन मुलगी गेली होती. तिथे तिला अचानक अभिषेक दिसला व त्याला पाहून ती घाबरली. तिने झुडपांच्या मागे लपण्याचा प्रयत्न केला. त्यानंतर अभिषेकने तिला जीवे मारण्याची धमकी देत लाकडी दांड्याने मारहाण करण्यास सुरुवात केली. शिवाय त्याने विद्यार्थिनीचा विनयभंग केला.
दुपारची वेळ असल्याने तेथे कुणीच नव्हते. हे पाहून अभिषेकने विद्यार्थिनीशी बळजबरीने शारीरिक अत्याचार केले. तक्रार केल्यास जीवे मारण्याची धमकी दिली. घरी आल्यानंतर मुलीने झालेली घटना घरच्यांना सांगितली. कुटुंबीय तिला अगोदर जरीपटका पोलीस ठाण्यात घेऊन गेले. घटनेचे ठिकाण सिव्हिल लाइन्स असल्याने त्यांना गिट्टीखदान पोलीस ठाण्यात पाठविण्यात आले. तक्रारीनंतर पोलिसांनी अभिषेकवर बलात्कार, विनयभंग, पॉक्सो, मारहाण व धमकीचा गुन्हा दाखल केला आणि त्याला अटक केली.
अपहरण करून अत्याचार
दुसऱ्या घटनेत ‘फेसबुक फ्रेंड’ने अल्पवयीन मुलीचे अपहरण करून तिच्यावर अत्याचार केल्याची घटना घडली. अल्पवयीन मुलगी गरोदर राहिल्याने हे प्रकरण उघडकीस आले आहे. आरोपी हा १९ वर्षीय तरुण गांधीबाग येथील रहिवासी असल्याचे सांगण्यात येत आहे. १६ वर्षीय अल्पवयीन मुलाच्या आईचा एका शिक्षकाशी दुसरा विवाह झाला आहे. या अल्पवयीन मुलीची फेसबुकवरून आरोपी तरुणाशी ओळख झाली होती. सुमारे अडीच महिन्यांपूर्वी तरुणाने अल्पवयीन मुलीला जबरदस्तीने वाकी परिसरात नेले. तेथे त्याने तिच्याशी शारीरिक संबंध ठेवले. हे कोणाला सांगू नकोस अशी धमकी दिली.
गेल्या काही दिवसांपासून या अल्पवयीन मुलीची प्रकृती खालावली होती. घरच्यांनी तिला डॉक्टरांकडे नेले. तेथे अल्पवयीन मुलगी गरोदर असल्याचे निष्पन्न झाले. यानंतर कुटुंबीयांनी सदर पोलीस ठाण्यात तक्रार दाखल केली. पोलिसांनी अपहरण, बलात्कार आणि पॉक्सोअंतर्गत गुन्हा दाखल केला आहे. फेसबुक आणि इलेक्ट्रॉनिक सर्व्हेलन्सच्या माध्यमातून पोलीस त्याचा शोध घेत आहेत.