१५ प्रतिष्ठानांना १.३५ लाखांचा दंड

लोकमत न्यूज नेटवर्क

नागपूर : कोविड नियमांचे उल्लंघन केल्याने मनपाच्या एनडीएस पथकांनी शनिवारी १५ प्रतिष्ठाने, कार्यालये व दुकानांवर कारवाई करून १.३५ लाखांचा दंड वसूल केला. पथकांनी दिवसभरात ५७ प्रतिष्ठाने व दुकानांची तपासणी केली. गांधीबाग झोनमध्ये नियमित कारवाई केली जात आहे. शनिवारी येथे सहा प्रतिष्ठानांवर कारवाई करून ४५ हजार दंड वसूल केला. याशिवाय, लक्ष्मीनगर झोनमध्ये एका प्रतिष्ठानावर कारवाई करून १५ हजार, धरमपेठ झोनमध्ये दोन प्रतिष्ठानांवर कारवाई करून ३५ हजार, धंतोली झोनमध्ये एका दुकानावर कारवाई करून पाच हजार, सतरंजीपुरा झोनच्या पथकाने रेडिमेड कापड दुकानावर कारवाई करून पाच हजार, तर लकडगंज पथकाने कापड दुकानावर कारवाई करून १० हजार दंड वसूल केला. आसीनगरात फूड प्रॉडक्टच्या दुकानाला १० हजार, मंगळवारी झोन पथकाने दोन प्रतिष्ठानांवर कारवाई करून १० हजार दंड केला. लक्ष्मीनगर, धरमपेठ झोनमध्ये प्रत्येकी ५, हनुमाननगर २, धंतोली ४, नेहरूनगर ६, गांधीबाग ८ सतरंजीपुरा २, लकडगंज १४, आसीनगर १३, तर मंगळवारी झोनमध्ये ४ प्रतिष्ठानांवर कारवाई करण्यात आली.