कोविडच्या रुग्णांसाठी १२०० बेड्‌स उपलब्ध होणार

- ५ हजार ऑक्सिजन सिलिंडर,

- २ हजार व्हेंटिलेटर लवकरच नागपुरात

- वर्धा येथे होणार रेमडेसिविरचे उत्पादन

नागपूर : शहरातील कोविड रुग्णांची उपचारांअभावी होणारी परवड लक्षात घेता, केंद्रीय मंत्री नितीन गडकरी यांनी १२०० अतिरिक्त बेड्‌स उपलब्ध करून देण्याचे निर्देश शुक्रवारी मनपा आणि एम्सच्या डॉक्टरांना दिले. त्यामुळे आता शहरात मेयोत १००, मेडिकल कॉलेज हॉस्पिटल १००, एम्स रुग्णालय ५०० आणि मनपाच्या रुग्णालयांमध्ये ३०० अतिरिक्त बेड्‌सची व्यवस्था तातडीने करण्यात येत आहे. तसेच ऑक्सिजनविना आणि व्हेंटिलेटरविना रुग्ण दगावत आहेत. लवकरच शहरात ५ हजार ऑक्सिजन सिलिंडर आणि २ हजार व्हेंटिलेटर उपलब्ध होत आहेत.

बैठकीत महापालिकेचे आयुक्त राधाकृष्णन्‌ बी, महापौर दयाशंकर तिवारी, आ. प्रवीण दटके, एम्सचे डॉ. मनीष श्रीगिरीवार, मैत्री परिवाराचे चंदू पेंडके उपस्थित होते.

निर्णयार्थ

एम्समध्ये ५०० बेड्‌स ऑक्सिजन आणि व्हेंटिलेटर्ससह तातडीने उपलब्ध करण्याचे निर्देश गडकरी यांनी दिले. यासाठी महापालिका बेड्‌स आणि आवश्यक साहित्य एम्सला देण्यास तयार आहे. मेयो, मेडिकलसह महापालिकेने आपले स्वत:चे ऑक्सिजन प्लॅन्ट उभे करण्यास त्वरित कारवाई करावी, यादृष्टीने गडकरी यांनी प्लॅन्टसंबंधी तज्ज्ञ व्यक्तींशी चर्चा केली. खासगी रुग्णालयांमध्ये बेड्‌स वाढवावेत यासाठी आवाहन करा व त्यांना बेड्‌स वाढविण्यासाठी त्वरित परवानगी देण्याचे निर्देश दिले. यासोबतच मनपाच्या ऑक्सिजन प्लॅन्टची क्षमता वाढविता येते काय, याद़ृष्टीनेही प्रयत्न करण्याच्या सूचना देण्यात आल्या. आयनॉक्स ही कंपनी ८५ टक्के ऑक्सिजन तयार करीत आहे. या कंपनीच्या पुरवठ्यावर सध्या नागपूर सुरू आहे. महापालिकेच्या जागेवर कुण्या एजन्सीला त्वरित प्लॅन्ट उभा करणे शक्य आहे काय, यासाठीही प्रयत्न सुरू आहेत. तसेच रेमडेसिविर या इंजेक्शनसाठी वर्धा येथील क्षीरसागर यांच्या कंपनीला गडकरी यांनी औषध उत्पादनाची मान्यता मिळवून दिली. उद्यापासून या फॅक्टरीमधून रेमडेसिविरचे उत्पादन सुरू होऊ शकते.