हनीट्रेक

>केनियातील ‘मसाई मारा’मध्ये साहस, धाडस, चित्तथरार यांना मर्यादा नाही. नदीच्या एका काठावरून पलीकडे जाण्यासाठी धडपडणारे हरिण किंवा झेब्य्राचे कळप, पलीकडच्या काठावर शिकारीसाठी त्यांची वाट बघत बसलेला एखादा बिबट्या आणि नदीच्या पात्रात आ वासून दबा धरून बसलेल्या मगरी असं चित्र मसाई मारामध्ये हमखास पहायला मिळतं. एका शांत दुपारी झाडीच्या गर्द छायेखाली एक चित्तीण आपल्या पिल्लासोबत पहुडली होती. पण अचानकच तिने झेप घेतली. दूर कुठे शिकार दिसते का ते पाहण्यासाठी ती उंचावर चढली. आम्ही अवाक होऊन पाहतच राहिलो. खरं तर बघण्यापलीकडे आम्ही काही करूच शकत नव्हतो. कारण ती ज्या उंच ठिकाणावर चढून सावज शोधत होती, ते ठिकाण म्हणजे आमच्या गाडीचं छत! तिच्या हालचाली पाहत अगदी स्तब्धपणे आम्ही गाडीत बसलो होतो. पण मनात एकच विचार डोकावत होता. भक्ष्याच्या शोधात असलेल्या या ‘माते’ची नजर आमच्यावर पडली तर?