मद्यपी पोलिसांचा वरातीत धुडगूस

अकोल्यातील घटना ; युवकांनी चोपले.

हिवरखेड ( जि. अकोला) : लग्नाच्या वरातीत धुडगूस घालणार्‍या मद्यपी पोलिसांना गावातील काही युवकांनी चोप दिल्याची घटना बुधवारी रात्री घडली. हिवरखेड येथे एका पोलिसाच्या कुटुंबात लग्न होते. आकोट आणि अकोला येथील पोलिसांना त्यासाठी निमंत्रित करण्यात आले. वरातीमध्ये सहभागी झालेल्या काही पोलिसांनी मद्यपान केले होते. त्यांनी रस्त्याच्या कडेला उभी असलेली वाहने आणखी बाजूला घेण्यासाठी आग्रह धरला. ते जाणार्‍या-येणार्‍यांना त्रासही देत होते. या पोलिसांची गावातील काही युवकांनी समजूत काढली; मात्र त्यांनाच या पोलिसांनी शिवीगाळ आणि धक्काबुक्की केली. त्यामुळे काही युवकांनी या मद्यपी पोलिसांना चोप दिला. त्यामुळे पोलिसांनी गावातून काढता पाय घेतला, अशी माहिती प्रत्यक्षदश्रींनी दिली. यासंदर्भात हिवरखेड येथील प्रभारी ठाणेदार अशोक सुर्यवंशी यांच्याशी संपर्क साधला असता त्यांनी वरातीत मारहाण झाल्याची कोणतीही तक्रार प्राप्त झालेली नसल्याचे स्पष्ट करून तक्रार प्राप्त झाल्यास त्यानुसार पुढील कारवाईबाबत निर्णय घेण्यात येईल, असे सांगीतले.