उपमुख्यमंत्रिपदाचा शपथविधी उद्या होणार? सुनेत्रा पवारांच्या नावावर चर्चा; बैठकीत निर्णय होणार

अनेक लोकांच्या सूचना पुढे येत आहेत. त्या रास्त आहेत. सुनेत्रा पवार यांच्याकडे हे पद द्यावे अशी अनेकांची मागणी आहे. ते चूक आहे असं वाटत नाही असं छगन भुजबळ यांनी म्हटलं.

मुंबई - अजित पवार यांच्या निधनाला ३ दिवस उलटले नाहीत तोवर राज्यात उपमुख्यमंत्रिपदाबाबत राजकीय हालचालींना वेग आला आहे. अजित पवारांचं बारामती येथे विमान अपघातात निधन झाले. त्यामुळे पवार कुटुंबाला मोठा धक्का बसला. गुरुवारी बारामतीच्या विद्या प्रतिष्ठान येथे अजित पवारांच्या पार्थिवावर अंत्यसंस्कार करण्यात आले. त्यानंतर सुनेत्रा पवार यांच्या नावाची उपमुख्यमंत्रिपदासाठी चर्चा सुरू झाली. सुरुवातीला मंत्री नरहरी झिरवाळ यांनी ही मागणी केली. त्यानंतर आता त्यादृष्टीने हालचाली सुरू झाल्या आहेत. 

आज सकाळी राष्ट्रवादीच्या प्रमुख नेत्यांनी मुख्यमंत्री देवेंद्र फडणवीस यांची भेट घेतली. यात सुनील तटकरे, छगन भुजबळ, प्रफुल पटेल यांचा समावेश होता. या भेटीनंतर छगन भुजबळांनी माध्यमांशी संवाद साधला. त्यात ते म्हणाले की, अजितदादा गेले, ते प्रत्यक्ष तिथे जाऊन पाहिले त्यानंतर झोप उडाली आहे. मात्र शेवटी Show Must Go On असं आहे. त्यामुळे कुणातरी ही सगळी जबाबदारी पक्ष असेल, सरकार असेल हे पुढे चालवायला हवे. त्यामुळे उद्या शनिवारी विधिमंडळाचे जे सदस्य आहेत त्यांची बैठक बोलावली आहे. त्यात विधिमंडळ नेतेपद जे अजितदादांकडे होते. त्या पदाबाबत निर्णय होईल असं त्यांनी सांगितले.

तसेच अनेक लोकांच्या सूचना पुढे येत आहेत. त्या रास्त आहेत. सुनेत्रा पवार यांच्याकडे हे पद द्यावे अशी अनेकांची मागणी आहे. ते चूक आहे असं वाटत नाही. ते करायला पाहिजे पण शेवटी निर्णय हा पक्षाच्या बैठकीत होईल. दोन्ही राष्ट्रवादी एकत्र येण्याबाबत माहिती नाही. सध्या अजित पवारांची राष्ट्रवादी आहे त्याची कामे पुढे नेण्यावर लक्ष देत आहोत. उपमुख्यमंत्रिपदाची जागा रिक्त आहे. ती ताबोडतोब सुनेत्रा वहिनींच्या द्वारे कशी भरता येईल त्याकडे आमचे सगळ्यांचे लक्ष आहे. बाकीचे पुढे बघता येईल. पक्षात लोक जे ठरवतील त्याप्रमाणे होईल असंही छगन भुजबळांनी म्हटलं.

दरम्यान, उद्या विधिमंडळ सदस्यांची बैठक आहे. विधिमंडळ पक्ष नेता ठरवण्याचा निर्णय त्यात होईल. कदाचित एकमत झाले आणि निवड झाली तर उद्याच्या उद्या शपथविधीही होऊ शकतो अशीही माहिती छगन भुजबळ यांनी दिली आहे. त्यामुळे सुनेत्रा पवार यांच्या रुपाने पहिलीच महिला उपमुख्यमंत्री महाराष्ट्राला मिळण्याची दाट शक्यता वर्तवली जात आहे.