विभागातील कनिष्ठ अभियांत्याच्या खुर्चीत बसून कारभार सांभाळणारा व्यक्ती कोण?, कारवाई शून्य 

उल्हासनगर महापालिका नगररचनाकार विभागात गोंधळ

उल्हासनगर : महापालिका नगररचना विभाग पुन्हा एकदा वादाच्या भोवऱ्यात सापडला आहे. विभागातील कनिष्ठ अभियंत्याच्या खुर्चीत बसून चक्क एक अनधिकृत व्यक्ती कारभार हाकत असल्याचा व्हिडिओ सोशल मीडियावर व्हायरल झाला. ज्यामुळे महापालिकेच्या या वादग्रस्त विभागातील सावळागोंधळ पुन्हा एकदा चव्हाट्यावर आला आहे.

उल्हासनगर महापालिका नगररचना विभागातील कनिष्ठ अभियंता यांच्या खुर्चीत  ऐक अज्ञात व्यक्ती बसून कारभार हाकत असल्याचा व्हिडीओ सोशल मीडियावर व्हायरल झाला. याप्रकाराने विभाग पुन्हा वादात सापडला. विभाग इमारत बांधकामाच्या परवानग्या आणि टीडीआर घोटाळ्यामुळे कायम चर्चेत राहिला असून काही टीडीआर शासनाने रद्द केले. यापूर्वी तत्कालीन नगररचनाकार याने स्वतः काही जण विभागात कामावर ठेवल्याचा प्रकार उघड झाला होता. कॅम्प नं-५ येथील झलक आणि खेमानी महापालिका शाळा परिसरातील एक इमारत थेट महापालिका रस्त्यावर येत असूनही तिला बांधकाम परवाना दिला कोणी? असा प्रश्न निर्माण झाला. 

आयुक्तांच्या भूमिकेकडे शहरवासीयांचे लक्ष

सोशल मीडियावर हा व्हिडिओ व्हायरल झाल्यावर, महापालिकेच्या कारभाराबद्दल नागरिकांनी व राजकीय पक्षाच्या नेत्यांनी तीव्र नाराजी व्यक्त केली. एका संवेदनशील आणि महत्त्वपूर्ण विभागामध्ये असे अनधिकृत व्यक्ती काम करत असतील, तर नागरिकांच्या फाईल्स आणि महत्त्वाच्या निर्णयांची गोपनीयता व कायदेशीरता धोक्यात येऊ शकते. आयुक्त मनीषा आव्हाळे यांनी यापूर्वीही अनेक कठोर निर्णय घेतले आहेत. आता या गंभीर प्रकाराची दखल घेऊन त्या कनिष्ठ अभियंत्यावर आणि संबंधित अनधिकृत व्यक्तीवर कायदेशीर व प्रशासकीय कारवाई कधी करतात, हे पाहणे महत्त्वाचे ठरणार आहे. हा व्हिडिओ म्हणजे केवळ एक झलक आहे, नगररचना विभागातील संपूर्ण कारभाराची सखोल चौकशी झाल्यास अनेक धक्कादायक खुलासे होण्याची शक्यता नाकारता येत नाही.